Orri hélt liðsfund án að­komu Arnars

Í viðtali við Vísi fór Arnar Gunnlaugsson, landsliðsþjálfari Íslands, ítarlega yfir málið. Hversu miklum vonbrigðum það hefði valdið en einnig lýsti hann yfir ánægju sinni með það hvernig tekið hafði verið á málinu. 

Fjárhættuspil og áfengisneysla nokkurra leikmanna milli leikja í nýafstöðnu landsliðsverkefni settu strik í reikninginn í undirbúningi liðsins og það sást innan vallar í lokaleiknum gegn Eistlandi ytra. 

Það var í Tallinn þar sem ljóst varð að nokkrir leikmenn hefðu gerst sekir um agabrot heima á Íslandi. Arnar hrósar því hvernig fyrirliði liðsins, Orri Steinn Óskarsson tók á málinu innan hópsins.  

Sýndu þessir leikmenn iðrun?

„Meira en iðrun,“ sagði Arnar í samtali við Vísi. „Þeir voru mjög leiðir yfir þessu. Ég er mjög stoltur af mínum fyrir­liða, Orri Steini, fyrir að hafa kallað leik­manna­hópinn saman og haldið góðan fund. Án aðkomu minnar. Það er mikilvægt að leik­menn fái að pústa. Við stigum skref í að verða al­vöru full­orðin­slið með því að tala hvorn annan til og veita aðhald. Ég var mjög sáttur við það. En á endanum er það þessara leik­manna, sem að gerðu þessa hluti, að sjá til þess að þetta gerist ekki aftur.“