„Maður upp­sker eins og maður sáir“

„Tilfinningarnar eru ekki góðar. Sigur hjá okkur í dag og bara fínn leikur en við vorum náttúrulega búnar að missa þetta úr okkar höndum. Rosalega súr tilfinning eftir svona niðurstöðu.“

Fyrir síðustu leiki tímabilsins hafði ekkert verið rætt um hvað tæki við ef niðurstaðan yrði fall. Öll athygli fór þess í að klára verkefnin sem framundan voru.

„Við höfum bara verið að einbeita okkur að þessum leikjum. Í fullri hreinskilni þá hefur maður varla getað hugsað um neitt annað en þessa leiki, þannig að nei, það hefur ekkert slíkt verið rætt.“

Fallið er sögulegt fyrir Val og aðspurð hvort niðurstaðan væri högg fyrir kvennadeild félagsins sagði Málfríður svo vera.

„Ég get svo sem bara talað fyrir sjálfa mig en þetta er svakalega mikið högg. Ég hef alltaf trúað því bæði þegar manni gengur vel og illa, að maður uppsker eins og maður sáir. Það er auðvitað ofboðslega sæt tilfinning þegar maður er búinn að leggja mikið inn og nær árangri. Aftur á móti er það rosalega súr tilfinning þegar manni líður eins og það hafi ekki allt verið skilið eftir og þá er þetta niðurstaðan.“

Mikil umræða hefur verið í kringum Val síðustu tvö tímabil um metnað félagsins. Ekki síst eftir að nokkrir reynslumiklir leikmenn yfirgáfu félagið eftir síðasta tímabil. Málfríður segir það hafa verið erfitt fyrir liðið að missa svo mikla reynslu.

„Það var mjög erfitt eftir síðasta tímabil að missa marga mjög reynslumikla leikmenn sem voru búnir að bera þetta lið uppi í mörg ár.“

„Ég er ekki mikið að pæla í því hvað er sagt um klúbbinn. Ég hef alltaf borið treyjuna stolt.