Óttast aðra mar­tröð í boði ís­lenska tann­læknisins

„Verður tannlæknirinn aftur martröð austurríska landsliðsins?“ var spurt í fyrirsögn austurríska miðilsins Kronen Zeitung í vikunni.

Í greininni er rifjað upp að Heimir, sem vissulega er menntaður tannlæknir, var ásamt Lars Lagerbäck þjálfari Íslands í ævintýri liðsins á EM 2016.

Ísland mætti þar Austurríki í lokaumferð riðlakeppninnar og þurfti Austurríki sigur til að komast áfram. Liðið lagði allt í sölurnar í lokin til að ná sigurmarki en í staðinn komst Ísland í ógleymanlega skyndisókn sem lauk með sendingu Theodórs Elmars Bjarnasonar á Arnór Ingva sem skoraði. Jón Daði Böðvarsson hafði komið Íslandi í 1-0 en Alessandro Schöpf jafnað metin á 60. mínútu.

Nánast öll umræða í kringum írska liðið síðustu daga hefur tengst leikjunum við Ísrael sem margir Írar vilja að sitt lið neiti að spila. Írland vann Ísrael 3-0 á sunnudaginn, eftir 1-0 tap gegn Kósovó í fyrsta leik, en Austurríki hefur unnið báða leiki sína, gegn Austurríki og Kósovó, og er því með sex stig á toppi riðilsins.

Sigurlið riðilsins kemst upp í A-deild og ætti einnig að eiga öruggt sæti í umspili fyrir EM 2028 verði þörf á því. Írland er einn af fjórum gestgjöfum EM 2028, ásamt Englandi, Skotlandi og Wales, og hefur UEFA frátekið tvö sæti fyrir gestgjafana. Þeir spila þó allir í undankeppninni en ef færri en tveir gestgjafanna komast beint á EM þá fær sá gestgjafi sem nær bestum árangri í undankeppninni frátekið sæti.