Yfir­menn Heimis teknir á teppið

Írland spilaði „útileik“ við Ísrael á sunnudaginn þar sem strákarnir hans Heimis fögnuðu 3-0 sigri, í Debrecen í Ungverjalandi. Liðin mætast svo aftur í Serbíu á sunnudaginn.

Í aðdraganda leiksins á sunnudag og raunar allt frá því að Írland dróst í riðil með Ísrael hefur verið mikil pressa á írsku leikmennina og írska knattspyrnusambandið um að sniðganga leikina við Ísrael vegna hernaðaraðgerða Ísraelsmanna á Gasaströndinni.

Allt fram á síðustu stundu íhuguðu leikmenn að hætta við að spila en eftir langan fund og kosningu var niðurstaðan sú að mæta Ísraelsmönnum. Markvörðurinn Gavin Bazunu ákvað hins vegar að draga sig úr hópnum en er aftur kominn inn fyrir leikinn við Austurríki í Dublin í kvöld.

David Courell, framkvæmdastjóri írska knattspyrnusambandsins, og John Martin, yfirmaður fótboltamála, voru kallaðir á fund þingnefndar í gær og fengu þar krefjandi spurningar frá þingmönnum sem var heitt í hamsi.

Þeir viðurkenndu þar að svo virtist sem enginn hefði rætt við Bazunu eða aðra markverði írska landsliðshópsins fyrir leikina við Ísrael. Heimir hafði áður sagt að hann hefði sjálfur aðeins rætt við útileikmenn um málið í aðdragandanum.

John Martin sagði Bazunu hafa ákveðið að ferðast með til Ungverjalands en þar skipt um skoðun og ákveðið að taka ekki þátt í leiknum. Hann sagði ekki rétt að Bazunu hefði í kjölfarið ekki fengið að taka þátt í kosningu leikmanna.

„Eftir að ákvörðun var tekin um að halda atkvæðagreiðsluna sögðum við leikmönnunum að fara aftur inn á herbergin sín, tala við sína nánustu og koma svo aftur til að kjósa. Hann [Bazunu] ákvað að koma ekki aftur. Honum var ekki haldið utan við,“ sagði Martin.

Þá þvertóku þeir Martin og Courell fyrir að Bazunu hefði verið útskúfað með nokkrum hætti og bentu á að hann hefði auk þess fengið stuðning sálfræðings.

Þingmennirnir spurðu út í ýmislegt fleira og sökuðu írska knattspyrnusambandið um að taka þátt í íþróttahvítþvotti og þjóðarmorði en því höfnuðu yfirmenn Heimis algjörlega. Þeir útskýrðu hve mikill fórnarkostnaðurinn yrði við að sleppa því að spila leikina og bentu á að samkvæmt kosningu meðlima írska sambandsins hefði meirihluti stutt þá ákvörðun að spila leikina.