Systir Ron­aldos tók til varna og hraunaði yfir portúgölsku þjóðina

Eftir að hafa þurft að dúsa á varamannabekk Portúgals í 2-1 sigrinum gegn Noregi í Osló í fyrrakvöld og sleppt því að fagna sigrinum með liðsfélögum sínum úti á velli hefur Ronaldo nú dregið sig úr portúgalska hópnum.

Þjálfarinn Jorge Jesus sagðist á blaðamannafundi í gær ekki hafa nýtt krafta hins 41 árs gamla Ronaldos gegn Noregi einfaldlega vegna þess að hann taldi aðra leikmenn henta betur í upplegg liðsins í þeim leik.

Ronaldo kveðst sjálfur ætla að útskýra ástæður brotthvarfsins síðar. Portúgalskir miðlar segja formann portúgalska knattspyrnusambandsins hafa flogið sérstaklega til Kaupmannahafnar til að reyna að miðla málum á milli Ronaldo og Jesus en það virðist engu hafa skilað. Formaðurinn hafði ætlað að vera viðstaddur sigur U21-liðs Portúgals á Gíbraltar sem skilaði liðinu inn á EM í gærkvöld.

Portúgalskir miðlar hafa auðvitað fjallað mikið um þá ákvörðun Ronaldo að yfirgefa landsliðið og þá hefur mikið grín verið gert að honum á samfélagsmiðlum. Þess ber að geta að fyrir tíma Ronaldo hafði Portúgal aðeins þrisvar komist á HM í allri sögunni. Með Ronaldo innanborðs komst Portúgal á sex HM af sex mögulegum auk þess að vinna EM 2016 og Þjóðadeildina í tvígang.

Viðbrögðin hafa reitt Elmu Aveiro, systur Ronaldos, til reiði og hún segir að portúgalska þjóðin eigi ekki skilið að hafa hann í liðinu. Hún skrifaði á Instagram:

„CR7 átti skilið meiri virðingu. Landsliðið átti skilið betra utanumhald. Portúgölsk blaðamennska átti skilið meiri hæfni og minni vangaveltur.

Hvað portúgölsku þjóðina varðar, tja... hún á ekki skilið að hafa það besta í neinu.

Við erum öfundsjúk, fyrirlitleg, fáfróð og eigum skilið að snúa aftur til þeirrar meðalmennsku sem við höfðum alltaf í fótbolta fyrir tíma CR7.

Takk fyrir allt, CR7! Þú áttir meira skilið!“