Lækka verð á þúsund vörum

Vöruverðið lækkaði um tvö prósent og gildir til áramóta. Í tilkynningu frá Högum segir að lækkunin nái til stórs hluta innflutnings Haga. Um sé að ræða almenna hilluvöru, kælivöru, drykkjarvörur, hreinlætisvörur og snyrtivörur. Í Bónus tekur lækkunin til fimmtán til tuttugu prósent af vöruúrvali. 

„Lægri verðbólga og lægri vextir eru hagsmunamál sem snertir samfélagið allt, frá heimilum til fyrirtækja landsins. Hátt vaxtastig þyngir m.a. fjármagnskostnað, dregur úr fjárfestingargetu og veikir kaupmátt landsmanna. Eitt stærsta hagsmunamál samfélagsins um þessar mundir er að ná niður vöxtum og verðbólgu og hefur þörfin á samstilltu átaki sjaldan verið meiri,“ segir í tilkynningunni. 

Lækkunin nær meðal annars til vara frá Euroshopper, Salling og Santa Maria. 

„Rekstur Bónuss er og verður okkar mikilvægasta framlag í baráttunni gegn verðbólgu í matvöru. Staðan nú er þó óvenjuleg og það skiptir miklu að samstaða náist milli aðila vinnumarkaðarins og stjórnvalda um að verja forsendur kjarasamninga. Við viljum leggja sérstaklega af mörkum til þess. Þess vegna lækkum við nú verð á stórum hluta vöruúrvals okkar og tryggjum að það hækki ekki fram að áramótum,“ er haft eftir Finni Oddssyni, forstjóra Haga, í tilkynningunni.

Hann hvetur stjórnvöld til að ganga á undan í baráttunni gegn verðbólgunni með góðu fordæmi. 

„Hagar skorast ekki undan ábyrgð og ég treysti því að aðgerð okkar verði öðrum hvatning til dáða og að hún stuðli þannig að verðstöðugleika, friði á vinnumarkaði og lækkun vaxta, öllum til hagsbóta,“ er haft eftir Finni.