Fengu tvö rauð spjöld fyrir hártog á tuttugu mínútum

Antigua og Barbuda sýndu mikla yfirburði í leiknum og var liðið 5-0 yfir í hálfleik. Liðið náði ekki að skora fleiri mörk í seinni hálfleik en hann átti engu að síður eftir að vera tíðindamikill. Scipio kom á völlinn fyrir Anguilla þegar um tuttugu mínútur voru eftir af leiknum en nánast um leið og Scipio fékk boltann þá var rifið í hárið á honum.

Það var Keon Greene sem gerði það og fékk hann verðskuldað rautt spjald fyrir atvikið. Þrátt fyrir að vera manni færri náðu Antigua og Barbuda að viðhalda 5-0 forystu en þegar komið var í uppbótartíma leiksins ákvað Shalon Knights að gera það sama og liðsfélagi sinn og toga í hár Scipio.

Hann fékk að líta rauða spjaldið fyrir það og þrátt fyrir að vinna leikinn 5-0 þá enduðu Antigua og Barbuda með aðeins níu leikmenn inni á vellinum. Bæði rauðu spjöldin komu á um 20 mínútna kafla.