„Það er bara á okkur að stíga upp núna“

„Ég held að hann hafi spilast akkúrat eins og við héldum að hann myndi spilast“ sagði Stefán Teitur Þórðarson leikmaður Íslenska liðsins eftir leik í dag. 

„Við vorum yfir á þessum sviðum sem að við héldum að við myndum vera yfir fyrir leikinn“

„Í fyrri hálfleik vorum við svolítið að þreyta þá og hreyfðum boltann fínt. Komumst nokkrum sinnum á bakvið þá en svo komum við út í seinni hálfleik og við erum alltof hægir sóknarlega“

„Við förum voðalega lítið á bakvið þá fannst mér og við ógnum þeim aldrei. Þeir fá svo tvö dauðafæri sem að við gefum þeim og svo þetta víti auðvitað“

Nokkrir leikmenn Íslenska landsliðsins voru að spila stöðu sem þeir hafa ekki endilega margir hverjir spilað oft áður þá helst aftarlega á vellinum. Stefán Teitur þar á meðal en hann byrjaði leikinn í hafsent í dag. 

„Mér fannst varnarleikurinn vera bara flottur í dag. Það var ekki vandamálið okkar í dag. Vandamálið var sóknarleikurinn hjá öllu liðinu og við gerðum það ekki nógu vel“

„Við sköpuðum alltof lítið af færum á móti þjóð eins og með fullri virðingu Eistlandi. Við eigum að skapa miklu meira en við gerðum í dag“

Hvað var það sem vantaði uppá til þess að skapa fleiri færi en raun bar vitni?

„Tempó og bara hraða. Fara á menn einn á einn og gefa fyrir. Gæðin í fyrirgjöfunum okkar í dag voru léleg, það er bara þannig. Það er bara á okkur að stíga upp núna í næsta leik og gera miklu betur“

Lúxemburg er næsti andstæðingur Íslands á þriðjudaginn kemur.

„Ég held við getum tekið fullt með okkur inn í það. Við erum mjög góðir á boltann og við stjórnum leiknum frá A-Ö“

„Það skiptir svo sem engu máli þó við stjórnum leiknum frá A-Ö. Við þurfum að vera miklu árásargjarnari inni í teig og keyra miklu meira á þá“ sagði Stefán Teitur Þórðarson.