„Það er bara allt eða ekkert“

Árni Gísli Magnússon skrifar 25. september 2026 22:28

Aðalsteinn Jóhann Friðriksson þjálfari Þór/KA. Guðmundur/Vísir

„Liðin sem skoraði fyrsta markið vann leikinn. Mér fannst svona við frekar vera ofan á þangað til fyrsta markið kemur eftir einhverskonar klafs og það var of mikið högg fyrir okkur í fyrri hálfleik. Mér fannst við taka yfir og eiga allan seinni hálfleikinn og þrýsta og pressa án þess kannski að skapa nógu mikið og ná að jafna og þannig fór sem fór“, sagði Aðalsteinn Jóhann Friðriksson, þjálfari Þór/KA, eftir sárt tap gegn Fram í næst síðustu umferð í neðri hluta Bestu deildar kvenna sem þýðir að Þór/KA getur enn fallið þrátt fyrir að vera fyrir ofan fallsvæðið fyrir lokaumferðina.

„Eins og ég segi, ég held að þetta hafi bara verið högg sem sjokkeraði okkur of mikið að fá mark og mörk á okkur en eins og ég segi við komum til baka og minnkum í 2-1 og eins og ég segi þrýstum og þrýstum í seinni en náum ekki inn maki sem að þýðir bara einfaldlega það að við erum að fara í enn einn úrslitaleikinn í lokaumferðinni“.

Þór/KA er fyrir ofan fallsvæðið með 22 stig líkt og Víkingur en með mun hagstæðari markatölu. Valur er neðst með 21 stig og mætir Fram í lokaumferðinni sem bjargaði sér endanlega í kvöld. Þór/KA þarf því sigur í lokaleiknum til að tryggja sæti sitt eða jafntefli svo lengi sem Valur vinnur ekki sinn leik.

„Ég ætla að vona að Fram geri það nú að þetta skipti Fram öllu máli en sú umferð horfir einfaldlega við mér þannig að við þurfum að fara á Víkingsvöll og ná í þrjú stig þar og þá verða allir glaðir.“

Úrslitaleikur framundan

Þór/KA er ekki vant því að spila úrslitaleik um að halda sæti sínu í deildinni og því spurning hvernig liðið takist á við það verkefni.

„Við náttúrulega vorum að tapa núna og ég hef ekki hitt liðið ennþá eftir leik þannig það á eftir að koma í ljós en við fáum núna viku til að undirbúa okkur fyrir hreinan úrslitaleik og það er bara hversu stórar við ætlum að vera og ég bara trúi ekki öðru en við mætum tvíefldar á Víkingsvöll og skiljum allt eftir þar til þess að vinna úrslitaleikinn.“

Leikurinn í kvöld var síðasti heimaleikur Þór/KA og var besta mæting sumarsins hingað til þar sem 322 áhorfendur létu sjá sig. Aðalsteinn er þakklátur fyrir stuðninginn og óskar eftir honum aftur í Víkinni.

„Bara að sjálfsögðu, ekki spurning, en fyrst og fremst þakklát fyrir fólkið sem kom og kallaði og mætti á völlinn og það bara er ég gríðarlega ánægður með en því miður þá náðum við ekki að vinna leikinn og það svona súra bragð situr eftir en eins og ég segi við megum ekki fara langt niður núna, við megum ekki vorkenna okkur of mikið því það er bara ein vika eftir af móti hjá okkur og það er bara allt eða ekkert.“

Ósáttur með dómgæsluna

Það voru mikil læti í leiknum og kölluðu leikmenn, þjálfarar sem og stuðningsmenn m.a. eftir fleiri vítaspyrnum. Aðalsteinn var því næst spurður út í dómgæsluna en Gunnar Oddur Hafliðason dæmdi leikinn.

Er eitthvað sem þú ert ósáttur við í dómgæslunni?

„Já“, sagði Aðalsteinn einfaldlega áður en hann var inntur eftir frekari svörum.

Eitthvað sem þú vilt fara nánar út í fyrir okkur?

„Nei, mér fannst bara allskonar leikstjórn og áherslur skrítnar en eflaust kunna þeir þetta allt saman og ekki við“, sagði Aðalsteinn að lokum.

Besta deild kvenna