Valur í hættu á að falla í fyrsta skipti í sögunni

Málfríður Anna Eiríksdóttir, fyrirliði Vals, er bjartsýn fyrir leikinn og þykir best að spila leiki þar sem mikið er undir. Það skiptir því minna máli að leikurinn sé upp á titil eða fall.

„Ég er bara mjög spennt fyrir þessum leik og hef trú á mínu liði. Mér hefur alltaf fundist gaman að spila leiki sem skipta miklu máli og þetta er klárlega einn af þeim.“

Valur hefur aldrei fallið úr efstu deild kvenna í fótbolta og er því um mikilvægan leik fyrir félagið að ræða. Málfríður Anna reynir ekki að hugsa mikið um það og reynir einungis að hugsa um einn leik í einu og fá úrslit.

„Ég hafði hugsað mér að vera ekki að pæla í stöðunni fyrir leikinn. Við vitum hvaða máli þessi leikur skiptir og við ætlum ekki að breyta neinu í undirbúningnum. Ég ætla bara að mæta í leikinn með kassann uppi ásamt mínu liði.“

Þrátt fyrir stöðu liðsins segir Málfríður Anna að það sé stemning í hópnum og að það sé ekki erfitt að peppa mannskapinn í leikina þrátt fyrir erfitt gengi.

„Við vitum allar að við eigum eitthvað inni og við erum allar vel gíraðar í að sýna hvað við eigum inni og láta ljós okkar skína,“ sagði Málfríður Anna sem hefur mikla trú á sínum liðsfélögum.

Leikurinn í kvöld er gegn Víkingi og er aðeins eitt stig sem skilur liðin að. Þrátt fyrir að lið Víkinga sé á erfiðum stað í deildinni ber Málfríður virðingu fyrir liðinu og býst við erfiðum leik í kvöld.

„Við höfum spilað hörkuleiki við þær í sumar þannig ég býst við hörkuspennandi leik. Það þurfa allir í liðinu að vera á deginum sínum til þess að fá sigur en við höfum fulla trú á að við náum því.“