Bakgarðsáskorunin: Öskraði á sjálfan sig til að vekja sig

Guðmundur Lúther, oftast kallaður Gummi Lú, er 39 ára landsliðsmaður í Bakgarðshlaupi. Hann tekur þátt í landsliðakeppninni sem fer fram þann 17. október. Hann hefur mest farið 43 hringi en hlaupið gengur út á að hlaupa 6,7 kílómetra á klukkustund, eins oft og hægt er.

Landsliðakeppni í Bakgarðshlaupi hefst 17. október og verður í beinni útsendingu á Vísi.

Hvenær byrjaðir þú að hlaupa?

Ég var í fótbolta eitthvað fram yfir þrítugt og eftir að ég hætti að spila þurfti ég að finna aðra leið til að fá útrás. En í rauninni byrjaði ég að stunda hlaup af ráði í Covid eins og margir aðrir.

Af hverju ákvaðst þú að taka þátt í Bakgarðshlaupinu? Hvað hefur þú tekið oft þátt?

Ég elska að testa mig og prófa nýja hluti, þannig afhverju ekki að prufa Bakgarðinn. Tók fyrst þátt í Heiðmörk árið 2023, en sá Bakgarður er líklega eftirminnilegastur fyrir veðrir sem var. Það var semsagt stormur allan tímann! Hætti ekki að rigna í 1 sek alan þann tíma sem ég var að hlaupa, en þá kláraði ég 100km.

Ég hef tekið þátt í 5 Bakgörðum, að meðtölum síðastliðnum Bakgarði í Heiðmörk, þar sem að við í landsliðinu tókum góða æfingu.

Hvern er best að spjalla við í hringnum?

Ef Tommi Jak er í kringum mann, þá er alltaf gleði.

Hvað er best að borða þegar þú tekur þátt í Bakgarðinum?

Í maí Bakgarðinum síðastliðnum, þegar að ég náði mínum besta árangri (43 hringir), þá prófaði ég næringu sem að heimsmeistarinn er mikið að vinna með. En það er Cocoa Puffs með súkkulaðimjólk (Hleðsla í mínu tilviki).

Ég var ekkert eðlilega spenntur að koma inn úr hverjum hring og fá skál af Cocoa puffs. Kláraði nokkra kassa.

Hvaða liðsmaður er með besta nestið?

Það toppar enginn mig með Cocoa Puffs-ið.

Hvað gerir þú þegar þú ert ekki að hlaupa?

Ég starfa sem sérfræðingur í stafrænni markaðssetningu. Önnur áhugamál hjá mér eru t.d. að ferðast til framandi landa, sem og um Ísland.

En hvað hreyfingu varðar, þá er ég líka virkur í Hyrox hjá Ultra Form.

Hvað ætlar þú þér að fara marga hringi í október?

Ég stefni á að slá Íslandsmetið. Vonandi með góðum hópi af fólki. Set markmiðið hátt og veit að ég á mikið inni frá Maí.

Hvað er það vandræðalegasta sem þú hefur lent í í Bakgarðshlaupinu?

Dettur ekki margt vandræðalegt í hug sem að hefur komið fyrir mig, en það skrýtnasta sem ég hef lent í er líklega seinni nóttina í Bakgarðinum núna í maí, en þá var ég byrjaður sjá ofsjónir. Í skóginum sá ég ýmsar verur og trén voru farin að ganga eins og í Lord of the Rings, ég var líka farinn að sjá allskonar skrýtin merki úr pollunum og ég veit ekki hvað. Mjög áhugavert.

Hver er uppáhalds Bakgarðsbrautin þín og af hverju?

Öskjuhlíðin er minn Bakgarður. Það er helst vegna þess að það er meiri stemming og fólk er á víð og dreif um brautina að hvetja. Á meðan að Heiðmörkin er með þægilegri braut, en ef maður fer inn í nóttina, þá er töluvert einmannalegra og minni stemming.

Hvaða liðsmaður kemur mest á óvart í hlaupinu?

Ég hef fulla trú á öllum í liðinu að geta bætt sig verulega. En sá sem ég held að muni bæta sig mest er Gunnar Lárus og jú líka Tommi.

Hver er þinn stærsti styrkleiki í Bakgarðshlaupi? En veikleiki?

Minn helsti styrkleiki myndi ég segja að sé að höndla svefnleysið og get troðið kolvetnum í mig endalaust. Helsti veikleiki er líklega hausinn.

Hvað er það skrítnasta sem þú hefur gert til að halda þér gangandi í hlaupi?

Ég man ekki eftir einhverju skrýtnu sem ég hef gert, nema kannski að mig rámar í að ég hafi verið að öskra á mig sjálfan til að vekja mig, en þetta var undir lokin í maí um miðja seinni nóttina þegar að ég var að hlaupa mikið einn.

Hver er duglegastur í liðinu við að hvetja aðra áfram?

Tommi Jak!

Ef þú mættir bara hlusta á eitt lag allan tímann, hvaða lag væri það?

Kickstart my heart með Motley Crew.

Hvernig myndir þú lýsa þér fyrir einhverjum sem þekkir þig ekki?

Vá, erfið spurning. Ætli ég myndi ekki segja að ég sé fyrst og fremst góð manneskja og svolítill vitleysingur líka. Ágætis blanda stundum.

Hvað er best að gera eftir Bakgarðshlaup?

Sofa, og svo fæ mér oftast Pönnu pizzu á Dominos.

Hver er líklegastur til að byrja að syngja á hlaupum?

Stuðullinn er lægstur á Þórdísi.

Ef þú ættir að lýsa liðinu með þremur orðum, hvaða orð myndirðu velja?

Gjörsamlega galið lið!