Segja aldrei jafn marga hafa stoppað stutt í „ræningjarennunni“

Þetta kemur fram í svörum Isavia til fréttastofu. Tilefnið er könnun FÍB á fyrirkomulaginu við tíu flugstöðvum í Evrópu. Félagið segir að hvergi sé sami „fantaskapur“ sýndur og Isavia geri með rennunni, sem félagið kallar „ræningjarennuna“ og skorar á Isavia að stækka hana. Ökumenn sem eru lengur en fimm mínútur í rennunni eru rukkaðir um fimm hundruð krónur fyrir hverja mínútu.

„Við á Keflavíkurflugvelli (KEF) munum fara yfir ábendingar FÍB og einnig hafa samband við fulltrúa félagsins til að opna á samtal. Varðandi gjaldtöku í rennunni svokölluðu við brottfararinnganginn að flugstöðinni á KEF þá var hún tekin upp fyrir um einu og hálfu ári,“ segir Guðjón Helgason upplýsingafulltrúi Isavia í svari til fréttastofu vegna málsins.

Rennan sé ætluð þeim sem þurfi að aka upp að flugstöðinni og stöðva bíl sinn þar í stutta stund til að hleypa úr farþegum og losa farangur. Rennan sé helst ætluð viðbragsaðilum eins og lögreglu, sjúkraflutningafólki og slökkviliði ef til dæmis slys verða.

„Þá skipta mínútur eða jafnvel sekúndur máli og okkar hlutverk að tryggja að aðgengi um rennuna sé ekki teppt með nokkrum hætti. 1.700 bílum er ekið í gegnum rennuna á dag og er umferðin mest á álagstíma á flugvellinum. Lítið má því út af bregða til að þar verði tafir og biðraðir myndist ef bílar eru stöðvaðir of lengi eða er jafnvel lagt í rennunni.“

Áttatíu prósent stoppuðu stutt en eru nú 97 prósent

Guðjón segir að athugun á notkun rennunnar yfir rúmlega mánaðar tímabil áður en breytingin var gerð hafi sýnt að áttatíu prósent bíla væru í rennunni í fimm mínútur eða skemur. Miðgildi dvalartíma hafi verið tvær og hálf mínúta, átta prósent bíla væru í rennunni í sextán til tuttugu mínútur, sem gæti valdið töfum, valdið gestum óþægindum og mögulega torveldað aðkomu viðbragsaðila.

„Á grundvelli þessa var ákveðið að miða við 5 mínútur. Bent var á að gjaldfrjálst væri að leggja á P1 skammtímastæðinu við hlið rennunnar í 15 mínútur og þá var gjaldfrjáls tími á P2 skammtímastæðinu komumegin við flugstöðina lengdur í 30 mínútur.“

Hann segir að ný og stórbætt aðkoma að komusvæðinu við Keflavíkurflugvöll hafi verið tekin í notkun í sumar með nýrri innkeyrslu, yfirbygðum gönguleiðum og aukinni þjónustu fyrir farþega og þá sem sækja ættingja og vini. Þar sé frítt að leggja í þrjátíu mínútur. Þá hafi verið gerðar breytingar á skiltum í og við rennuna brottfararmegn til að tryggja sem besta upplýsingagjöf til farþega.

„Eftir að gjaldtakan hófst hefur notkun á rennunni tekið breytingum. Nú stoppa ríflega 97% bíla þar í í fimm mínútur eða skemur og aðeins um 3% eru lengur en í fimm mínútur í rennunni. Varðandi mögulegar breytingar á aðkomunni að flugstöðinni þá eru framkvæmdir á vellinum byggðar á þróunaráætlun fyrir KEF sem gerð er til 25 ára í senn og uppfærð reglulega.“