„Þurfum að læra að spila leiki af þessari stærðar­gráðu“

„Alls konar,“ svaraði Guðni aðspurður hvað hefði getað farið betur í sóknarleik FH í dag en í fyrsta sinn á tímabilinu mistókst liðinu að skora.

„Við fengum samt tækifæri til að skora. Það er alveg þannig og til dæmis úrvalsfæri í stöðunni 1-0 í fyrri hálfleik og nokkur í þeim seinni. Mörk breyta leikjum.“

Hjartað sló örugglega ört

Guðni segir að taugarnar hafi eflaust verið þandar hjá ungu liði FH í leiknum í dag. Fjölmenni var á vellinum en rúmlega þúsund manns sóttu leikinn í Kaplakrika.

„Breiðablik vinnur þennan leik 3-0 og vinnur sanngjarnt. Þær voru miklu betri í fyrri hálfleik. Við vorum á hælunum á löngum köflum. Þær keyrðu bara á okkur, keyrðu yfir okkur og við náðum ekki að svara. Leikmenn FH-liðsins draga mikinn lærdóm af þessu. Þetta eru ungir leikmenn og ég held að þetta sé yngsta liðið í deildinni. Þær þurfa að læra af þessu; að spila svona leiki. Mikil umgjörð og fullt af fólki og hjartað sló örugglega ört hjá mörgum ungum leikmönnum FH-liðsins,“ sagði Guðni. 

„Það náðist enginn taktur í fyrri hálfleik. Við spiluðum fótboltaleik sem er ólíkur þeim leik sem FH er vant að spila. Við fórum yfir hlutina í hálfleik og ég er miklu ánægðari með seinni hálfleikinn. Hann var miklu betri af hálfu FH. Við komum okkur klárlega í stöður til þess að minnka muninn og ef við hefðum náð að koma inn marki hefði mögulega komið meiri skjálfti komið mögulega í Blikaliðið og við hefðum kannski fundið einhverja lykt. En lyktin kom aldrei af því að þær skora síðan eitthvað ótrúlegt mark, þriðja markið, það slökkti svolítið í okkar vonum. En það er bara áfram gakk. Þessi leikur var upp á þrjú stig og þau fóru til Breiðabliks og hann var ekki að móta eitt né neitt. Hann bara gerði það að verkum að Blikarnir fóru fyrir ofan okkur og það getur bara breyst strax í næsta leik.“

Réðum ekki við ákefð Blikanna

Guðna fannst lið FH ekki sýna sitt rétta andlit í fyrri hálfleik. Breiðablik var 0-2 yfir að honum loknum.

„Ég er ósáttur við hvernig við förum inn í leikinn. Fyrri hálfleikurinn var skrítinn af okkar hálfu. Við réðum ekki við ákefð Blikanna. Við fórum að beita einhverjum löngum boltum og vorum ekki að tengja saman sendingar. FH-liðið er þannig lið að það spilar sig í gegnum andstæðinginn sem það gerði oft á tíðum í seinni hálfleik. En það bara datt allur botn úr þessu fannst mér í fyrri hálfleik, liðið var ólíkt sjálfu sér og alls ekki ósanngjarnt undir í fyrri hálfleik,“ sagði Guðni. 

„Það var óþarfi að fá þetta mark á sig þarna á 40. mínútu eða hvenær sem seinna markið var. Eftir einhvern langan bolta og í gegnum allan pakkann og bara bang og mark. En áfram gakk og allt það. Þessi leikur mótar okkur ekki en það er eins gott að við lærum af honum. Það er það sem við þurfum að gera; læra að spila leiki af þessari stærðargráðu.“