Strákarnir í úr­slita­leikinn og upp í A-deild eftir risasigur

Íslenska liðið vann sannfærandi 44 stiga sigur á Bosníu í undanúrslitaleiknum í kvöld, 95-51, eftir að hafa verið 47-30 yfir í hálfleik.

Íslensku strákarnir tóku öll völd snemma í leiknum og voru komnir fjórtán stigum yfir, 29-15, eftir fyrsta leikhluta. Eftir þessa frábæru byrjun var ljóst í hvað stefndi en okkar strákar gáfu ekkert eftir og hreinlega keyrðu yfir Bosníumenn sem áttu engin svör.

Þrjár efstu þjóðirnar tryggja sig upp í A-deildina og farseðillinn þangað er því í höfn með sæti í úrslitaleiknum.

Valsarinn Atli Freyr Haraldsson Katrínarson og Keflvíkingurinn Davíð Breki Antonsson voru nálægt þrennu. Atli Freyr var með 16 stig, 8 fráköst og 7 stoðsendingar en Davíð Breki með 11 stig, 9 fráköst og 7 stoðsendingar.

Stjörnustrákarnir Kormákur Nói Jack og Jón Breki Sigurðarson voru mjög öflugir undir körfunum í kvöld. Kormákur var með 20 stig og 10 fráköst en Jón Breki skoraði 9 stig, tók 12 fráköst og varði 3 skot.

Stjörnustrákurinn Baltasar Torfi Hlynsson skoraði 14 stig, Keflvíkingurinn Arnar Freyr Elvarsson skoraði 9 stig og Sindramaðurinn Hlynur Ingi Finnsson var með 6 stig.

Íslensku strákarnir hafa unnið sex af sjö leikjum sínum á mótinu en þeir hafa komið á móti öflugum þjóðum eins og Úkraínu, Norður-Makedóníu, Sviss, Kýpur og Svartfjallalandi.

Íslenska liðið vann báða leiki sína í útsláttarkeppninni með sannfærandi hætti því Svartfellinga unnu strákarnir með 22 stiga mun í átta liða úrslitunum.

Króatía og Eistland mætast í seinni undanúrslitaleiknum í kvöld en það þarf eitthvað mjög óvænt að gerast ef íslensku strákarnir mæta ekki hinu gríðarlega sterka króatíska liði í úrslitaleiknum á morgun.