Guð­rún Karítas í úr­slit og Elísa­bet ná­lægt því

Guðrún Karítas Hallgrímsdóttir tryggði sér sæti í úrslitum með 70,31 metra kasti í fyrstu tilraun. Þetta var sjötta lengsta kastið í undankeppninni en það þriðja lengsta í hennar riðli.

Eftir þetta flotta fyrsta kast var Guðrún í mjög góðum málum en hin köstin hennar voru upp á 69,70 metra og 66,15 metra. Annað lengsta kastið hefði því líka skilað henni í úrslitin.

Elísabet Rut Rúnarsdóttir hafði áður keppt í fyrri riðlinum og kastað þar lengst 67,50 metra. Hún varð sjötta í sínum riðli en það mátti sjá á svip hennar eftir misheppnað síðasta kast að sætið í úrslitunum hefði líklegast runnið frá henni.

Elísabet var samt lengi í hópi tólf efstu en datt úr í síðustu umferðinni og endaði í fjórtánda sæti. Allar nema ein fyrir ofan hana komust því í úrslit. Hún hefði samt þurft að kasta næstum því metra lengra til að komast í tólf manna úrslit.

Guðrún hafði kastað yfir sjötíu metra í ellefu af fjórtán keppnum sínum á árinu og setti líka Íslandsmet með því að kasta 73,88 metra.

Elísabet varð bandarískur háskólameistari í júní þegar hún kastaði 73,19 metra og tryggði sér sinn annan NCAA-titil í sleggjukasti. Hún var því nokkuð frá sínu besta í kvöld.

Úrslitin í sleggjukasti kvenna fara fram á miðvikudagskvöldið en annað kvöld keppir Hilmar Örn Jónsson í úrslitum í sleggjukasti karla.