Breytingar á fyrsta far­rými

Tómas Ingason, framkvæmdastjóri tekju-, þjónustu- og markaðssviðs, segir í tilkynningu að mikil aukning hafi verið í sölu á Saga Premium fargjöldum undanfarin misseri.

„Við sjáum tækifæri í því að mæta betur ólíkum þörfum, óskum og væntingum okkar viðskiptavina með því að bjóða meiri sveigjanleika og val. Þetta er fyrsta skrefið en við stefnum að því að kynna fleiri nýjungar á árinu 2027, meðal annars nýjan Saga fargjaldaflokk sem býður upp á skýrari valkosti og meiri sveigjanleika fyrir fólk sem til dæmis vill fyrst og fremst þægilegra sæti á Saga farrýminu yfir í það að kjósa áfram að hafa allt innifalið.“

Í tilkynningu segir að breytingarnar séu hluti af stærri vegferð félagsins við að þróa þjónustu sína í takt við breyttar þarfir viðskiptavina og þróun á alþjóðlegum flugmarkaði. Markmiðið sé að bjóða meira val og aukinn sveigjanleika fyrir viðskiptavini við að velja þá þjónustu sem hentar þeim best hverju sinni.

„Saga Premium Flex fargjaldið, þar sem allt er innifalið og mikill sveigjanleiki er til breytinga, verður óbreytt, en frá og með deginum í dag mun ein 32 kg taska fylgja með Saga Premium fargjaldi í stað tveggja og gjald verður tekið fyrir val á sæti. Ef ekkert sæti er valið verður því úthlutað án endurgjalds á flugvellinum. Fargjaldinu mun áfram fylgja hágæða þjónusta, þægileg sæti, máltíð um borð, aðgangur að þráðlausu neti, forgangsþjónusta á flugvöllum, aðgangur að betri stofu á Keflavíkurflugvelli og fleira,“ segir í tilkynningu.