Teslan á sjálf­stýringu þegar hann klessti á

Shanahan sat fyrir svörum á blaðamannafundi í gær, í fyrsta sinn eftir slysið sem varð þann 14 júní. Shanahan segir bílinn hafa verið á sjálfstýringu en að hann virðist hafa óvart tekið stillinguna af er hann teygði sig eftir farsíma sem datt í gólfið.

Hann hafi notað sjálfstýringuna reglulega í um áratug og aldrei lent í vandræðum fyrr.

„Þetta er eitthvað sem ég er vanur að nota, ég veit ekki hvað gerðist þegar ég sneri mér við, hvort hún bilaði eða hvort ég hafi slökkt á henni? Ég veit það ekki fyrir víst,“ sagði Shanahan við blaðamenn.

„Burt séð frá þvó er það alltaf sjálfum þér að kenna, hvort sem bíllinn er stilltur á sjálfstýringu eða ekki. Þú mátt ekki taka augun af veginum. Keyrsla er samspil. Þú kemur því ekki bara yfir á einhverja tölvu. Það er fín lexía.“

Tesla Shanahans sveigði yfir á öfugan vegarhelming, á móti umferð, og hann klessti á Mercedes Benz jeppa. Bílstjóri hins bílsins slapp ómeiddur frá slysinu en Shanahan braut rifbein, bein í vinstri hendi og fékk skurð á hægri augabrún sem þurfti 40 spor til að loka.

Hvorugur var undir áhrifum og sagði lögreglan að ekkert hafi mælst í blóði bílstjóranna. Shanahan segist hafa verið á heimleið frá kírópraktor þegar slysið varð.

Shanahan er enn að jafna sig eftir slysið en segist stefna á að vera á hliðarlínunni þegar hans menn mæta Tennessee Titans í fyrsta æfingaleik sumarsins á fimmtudaginn kemur.