„Gjör­sam­lega hömruðum járnið á meðan það var heitt“

„Frábær liðssigur og það er ógeðslega gaman að vinna“ sagði Sindri Snær Magnússon eftir sigurinn í kvöld.

„Það er langt síðan við spiluðum leik og það er alltaf gott að vinna eftir versló, það er erfiðast“

Keflavík endaði fyrri hálfleikinn frábærlega eftir brösótta byrjun og lagði þar grunn að öflugum sigri.

„Bara í fyrri hálfleik augljóslega, við skorum þrjú mörk og mér fannst við byrja svolítið hægt en svo skorum við hérna eftir smá erfiðan kafla og svo gjörsamlega hömruðum við járnið á meðan það var heitt og litum eiginlega ekki til baka eftir það“

Sindri Snær skoraði fyrsta mark Keflavíkur í leiknum og honum fannst koma smá ró á sitt lið eftir að þeir komust yfir.

„Já, klárlega, við byrjuðum smá styrt og vorum ekki alveg að ná að klukka þá en eftir það kom bara ógeðslega góður kafli og fylgdu tvö mörk eiginlega bara með stuttu millibili á eftir og það kláraði leikinn. Það var svo bara ógeðslega góð vinnsla og liðsheild hérna í seinni hálfleik“

Keflavík missti mann af velli á 62. mínútu leiksins þegar Eiður Orri Ragnarsson fékk að líta sitt annað gula spjald og þar með rautt. Það var þó ekki að sjá á liðinu að það hefði misst mann af velli.

„Nei, klárlega, við fáum besta færið þegar Mudri [Marin Mudrazija] fær geðveikt færi og hann ver ógeðslega vel í markinu. Við fáum besta færið einum færri þannig að það var bara áfram og liðið hljóp og hljóp og við verðskulduðum sigurinn“

Keflavík er nú í efri hluta deildarinnar þegar stutt er fram í skiptingu. Þeir eru frekar að horfa upp fyrir sig en niður fyrir sig.

„Gerir maður það ekki alltaf? Maður kíkir alltaf á hvað er stutt í næsta sæti fyrir ofan sig og við höldum því bara áfram“

„Þetta snýst bara um eitt í rauninni og það er að halda áfram að spila vel og halda áfram að safna punktum og svo skoðum við það hvað gerist seinna,“ sagði Sindri Snær Magnússon.