Misstu Svisslendingana frá sér á hræði­legum loka­mínútum

Leikurinn var úrslitaleikur um það hvort liðið spilaði um 9. til 12. sæti eða um 13. til 16. sæti.

Sviss kláraði leikinn af krafti og vann átta stiga sigur, 83-75.

Íslensku strákarnir voru 73-70 yfir þegar þrjár og hálf mínúta var eftir af leiknum en töpuðu lokakaflanum 13-2.

Íslenska liðið var yfir í rúmar 24 mínútur samanlagt í leiknum en hræðilegur endir fór með leikinn.

KR-ingurinn Benóní Stefan Andrason var stigahæstur með 18 stig og 8 fráköst en Stjörnumaðurinn Jakob Kári Leifsson skoraði 17 stig. Patrik Joe Birmingham skoraði 12 stig en þeir Leó Steinsen og Sturla Böðvarsson skoruðu báðir átta stig.

Íslenska liðið mætir Finnlandi eða Norður-Makedóníu á morgun í leik þar sem er spilað um að fá að leika um þrettánda sætið á mótinu en tapliðið spilar um fimmtánda sætið. Finnland og Norður-Makedónía spila seinna í kvöld.