Fljótasti hvíti maður sögunnar

Kennedy kom í mark á 9,85 sekúndum sem þýðir að hann er nú fljótasti hvíti maður sögunnar. Ástralinn bætti þar met bandaríska hlauparans Sam Blaskowski sem hljóp á 9,88 sekúndum í maí á þessi ári. Metið var þó í eigu Frakkans Christophe Lemaitre í meira en áratug þar á undan.

Kennedy vann þó ekki hlaupið heldur varð að sætta sig við silfurverðlaun á eftir sigurvegaranum Emmanuel Eseme frá Kamerún.

„Þetta var svo sannarlega ekki fullkomið hlaup. Ég veit að ég á svo miklu meira inni,“ sagði Kennedy við Channel Seven, skömmu eftir hlaupið, ennþá móður eftir átökin. „En ég ætla að fagna í bili. Ég ætla að vera glaður í bili,“ sagði Kennedy

Með því að hlaupa á 9,85 sekúndum og í löglegum meðvindi upp á 1,3 m/s setti Queensland-búinn eins og áður sagði nýtt landsmet. Hann var eins og fleiri búinn að vera að elta goðsagnakennda tímann hjá Patrick Johnson frá í Japan árið 2003 (9,93 sekúndur) en það hafði lengi reynst hraðskreiðustu mönnum Ástralíu erfitt.

„9,85 er geggjað. Það er bara galið. Ég ætla ekki að hægja á mér, ef þú skilur hvað ég meina. Ég held að það verði ansi erfitt að hlaupa svona hratt aftur en ég er ánægður núna. Ég er ánægður með að geta sagt að ég hafi hlaupið á þessum tíma, náð þessu ástralska meti loksins. Það var kominn tími til,“ sagði Kennedy.