„Er hægt að bjóða upp á þetta ár eftir ár?“

KA náði bara í eitt stig á móti botnliði Þórs í síðustu umferð og situr aðeins tveimur stigum frá fallsæti eftir 16 umferðir.

Albert Brynjar Ingason, sérfræðingur Stúkunnar, ræddi gengi KA þegar Stúkan fór yfir sextándu umferðina.

„Þú ert að tala um að þetta hafi verið stórt stig og báðir þjálfarar sáttir. Ég veit það samt ekki,“ sagði Albert.

„Ef við setjum nágrannaslaginn til hliðar þá erum við að tala um Þórsliðið sem er mjög ungt lið og með litla reynslu í efstu deild. Svo horfum við á hvað er búið að leggja í þetta KA-lið og nöfnin þar og bara hvað þetta er dýrt lið,“ sagði Albert.

„Það skiptir engu máli að þetta sé KA á móti Þór því kröfurnar hljóta að vera að vinna tólfta sætið á heimavelli. Ef við tölum um gæði leiksins þá fannst mér bara eins og ég væri að horfa á tvö Lengjudeildarlið. Frammistaða KA var ekki góð,“ sagði Albert.

„Taflan liti alls ekki vel út ef þeir hefðu tapað þessum leik,“ sagði Halldór Árnason, sérfræðingur Stúkunnar, en Albert skaut strax inn.

„Hún hefði ekkert litið vel út heldur þótt þeir hefðu unnið leikinn,“ sagði Albert og sagði að hann gæti bara rifjað upp sömu punkta og hann var að tala um á sama tíma í fyrra.

„Hvað er þetta þriðja árið í röð sem við erum að tala um þetta hjá KA? Það er hægt að fara til baka í júlí í fyrra og nota sömu punkta og þar. Er hægt að bjóða upp á þetta ár eftir ár? Að liðið bara svona rétt reddi sér í lokin og endi í sjöunda sætinu,“ sagði Albert

„Þarf ekki einhvern tímann stigasöfnunin að fara að ríma við metnað stjórnarinnar? Af því að þetta er dýrt lið,“ sagði Albert en það má horfa á alla umræðuna hér fyrir ofan.