Lebron fer til Fíladelfíu

Þetta staðfestir Rich Paul, umboðsmaður James, í samtali við Shams Charania hjá ESPN. 

Þetta er fjórða liðið sem LeBron James mun spila fyrir í NBA deildinni en hann hefur spilað fyrir Los Angeles Lakers síðan 2019. Áður hefur hann spilað fyrir Miami Heat og Cleveland Cavaliers. Hann hefur fjórum sinnum á ferlinum verið NBA-meistari og náði því síðast árið 2020 með LA Lakers.

James skrifaði ekki undir nýjan samning hjá Los Angeles Lakers og hafa verið miklar vangaveltur um hvert LeBron James myndi fara en Fíladelfía varð fyrir valinu. Í vikunni birti fyrrverandi lið LeBron James, Miami Heat, óvart tilkynningu um að félagið ætlaði að kynna leikmanninn aftur til leiks. Nú er ljóst að ekkert verður úr því.

LeBron James er 41 árs gamall og því farið að síga á seinni hluta ferilsins hjá honum. Þetta er 24. tímabilið sem hann er leikmaður NBA en enginn á jafn mörg tímabil í deildinni. Hann hefur verið valinn verðmætasti leikmaður deildarinnar fjórum sinnum auk þess sem hann hefur verið valinn mikilvægasti leikmaður úrslitaeinvígisins og gerði það nú síðast árið 2020.

Philadelphia 76ers hefur verið duglegt að sækja sér leikmenn en Jaylen Brown skrifaði undir samning við liðið. Hann var valinn mikilvægasti leikmaður úrslitaeinvígisins 2024 þegar hann varð NBA-meistari með Boston Celtics.

Síðasti NBA-meistaratitill 76ers kom árið 1983 og því hafa stuðningsmenn félagsins þurft að bíða lengi eftir öðrum titli. Liðið komst síðast í úrslitaeinvígi deildarinnar árið 2001 þar sem Allen Iverson var stjarna Fíladelfíu-liðsins. Þar tapaði 76ers úrslitaviðureigninni við Los Angeles Lakers sem var með Kobe Bryant og Shaquille O'Neal innanborðs.