Fyrrum UFC-meistari vinnur fyrir sér sem sendill

Þessi 34 ára brasilíska bardagakona hefur ekki keppt síðan hún tapaði fyrir Loopy Godinez í ágúst síðastliðnum en hún meiddist á öxl í bardaganum.

Andrade hefur barist þrjátíu sinnum í UFC frá því hún hóf keppni árið 2013 og hefur unnið sautján af bardögum sínum.

„Ég vinn sem sendill. Ég sendi mat og þess háttar. Ég tek bara við pöntunum í gegnum smáforrit og sé um sendingarnar,“ sagði Jessica Andrade í brasilíska MMA-hlaðvarpinu Direto de Vegas en breska ríkisútvarpið segir frá.

„Ég geri hvað sem þarf. Ég er ekki hrædd við erfiðisvinnu. Ég get gert nánast hvað sem er,“ sagði Andrade.

Andrade sagðist líka hafa byrjað á landslagsverkefni heima hjá vini sínum sem felur í sér að fjarlægja grjót, leggja gras og mála girðingar.

„Ef ég er góð í þessu bætist það við það sem ég get gert ef mig vantar einhvern tímann peninga. Við þurfum smá aukapening,“ sagði Andrade.

Árið 2018 sagðist Andrade hafa selt UFC-fötin sín, bakpoka og hanska vegna þess að hún átti í erfiðleikum með að fá styrktaraðila, en bætti við að hún fengi „mjög vel borgað“ hjá samtökunum.

Árið 2023 sagðist hún hafa barist fimm sinnum til að borga fyrir skilnað sinn, en árið eftir sakaði hún fyrrverandi þjálfara sinn, Gilliard Parana, um að hafa haldið eftir peningum frá henni. Parana neitaði öllum ásökunum.

Laun UFC-bardagakappa hafa verið gagnrýnd af íþróttamönnum og fjölmiðlum en UFC greiðir um tuttugu prósent af tekjum sínum í laun til bardagakappa á meðan hnefaleikakappar fá um sextíu prósent af tekjum af sínum viðburðum.

Þegar White var spurður út í gagnrýnina hefur hann bent á að laun UFC-bardagakappa hafi hækkað frá árinu 2001.