„Þurfum að læra að stýra spennustiginu á milli verk­efna“

„Það vantaði meiri grimmd hjá okkur og hraða á boltann. Við vorum alveg að koma okkur í góðar stöður, fengum góð færi til að koma okkur yfir. Við vorum klaufar fyrir framan markið og síðan er okkur bara refsað með tveimur hornspyrnum frá Þórsurum. Allt hrós á Þórsara, þeir börðust eins og ljón í leiknum.“

Það voru margar breytingar gerðar á byrjunarliði Víkings en sjö nýir leikmenn komu inn í liðið frá síðasta leik og þá voru aðrir utan hóps sem spila yfirleitt. 

„Sennilega hefur það einhver áhrif inn í liðið, leikmenn sem hafa ekki spilað í lengri tíma en við erum með stóran hóp og góða leikmenn sem geta komið inn í þetta. Ég taldi þetta vera besta liðið í dag og tek bara ábyrgð á því. Við vorum alveg að spila ágætis fótbolta fyrir utan klaufa mistök og ákvarðanatökur inn á milli en við sköpum meira en Þórsarar og við komum okkur í betri stöður og færi. Þannig að leikurinn hefði alveg geta farið á okkur vegu og þá hefði þessi spurningin verið öðruvísi.“

Víkingar eru nýkomnir úr leik í forkeppni Meistaradeildar Evrópu þar sem þeir komust í næstu umferð á milli þess sem þeir spila í Bestu deildinni. 

„Við erum í mikilli törn núna og við þurfum róta í hópnum, halda mönnum ferskum og ég taldi þetta bara vera leiðin með framhaldið í huga. Við þurfum líka aðeins að horfa fram í tímann, það tókst ekki í dag en við þurfum bara að læra af því. Við þurfum að læra að vera í þynnku vegna Evrópuleikja, það eru miklar tilfinningar í Evrópu og síðan stuttu síðar aftur komnir í Bestu deildina. Fljúga norður og spila á móti Þór þannig það er hægara sagt en gert að ná spennustiginu aftur upp á sama spennustig og það var fyrir leikinn á móti Györ. Það hefur sýnt sig síðustu ár að þetta er erfiður kafli hjá félagsliðum að fara í gegnum þessa törn en við þurfum að læra af því. Við þurfum að búa til einhvers konar mynd í hausnum og læra hvernig við stýrum spennustiginu á milli verkefna.“