„Skil ekki hvernig menn geta flaggað á eða séð eitt­hvað sem gerist ekki“

Rangstaða var ranglega dæmd á Marin Mudrazija þegar hann virtist vera að koma Keflavík í 0-2 í fyrri hálfleik og þótti honum dæmt brot á Eið Orra Ragnarsson fyrir litlar sakir þegar hann var kominn í dauðafæri undir blálokin og hefði getað jafnað í 2-2.

„Þetta var gríðarlega svekkjandi. Ég upplifði leikinn þannig að við spiluðum mjög vel í dag. Við verðskuldum alls ekki að tapa þessum leik. Við erum ofan á í löngum hluta leiksins og skorum löglegt mark í 2-0 þar sem er dæmd rangstaða á einhvern ótrúlegan hátt.

Ég skil ekki hvernig menn geta flaggað á eða séð eitthvað sem gerist ekki. Þetta er bara magnað. En ókei. Seinni hálfleikur, við komum mjög grimmir og aggressívir út í hann með góða pressu. Við sköpum okkur góðar stöður til þess að komast í 2-0.

Við getum svo sem sjálfum okkur um kennt þar að gera ekki betur í þeim stöðum sem við vorum komnir í. Svo held ég nú að það sé nú heldur aldrei brot á Eið hérna í lokin. Ég held að Kiddi [Kristinn Jónsson] sparki nú í Eið en hann er klókur og lætur sig detta,“ sagði Haraldur í samtali við Sýn Sport eftir leikinn.

2-0 staða er helmingi betri

Taldi hann fullvíst að leikurinn hefði þróast á annan veg hefði Keflavík verið tveimur mörkum yfir í leikhléi.

„Já, ég meina það er klárt að mörk breyta leikjum. 2-0 staða er helmingi betri en 1-0 þannig að það hefði verið betra að fara með 2-0 inn í hálfleikinn. Það er klárt mál,“ sagði Haraldur, sem var þó ánægður með frammistöðu sinna mann.

„Ég er mjög ánægður með vinnuframlagið og það sem við leggjum í leikinn. Í raun og veru spiluðum við fínan fótboltaleik, sköpuðum okkur alveg nóg og vörðumst vel.

Þeir jafna á okkur þegar við erum einum færri, Mudri þarf að fara út af í eina mínútu. En þetta er bara fótboltinn, svona er þetta,“ sagði Haraldur Freyr Guðmundsson að lokum í samtali við Sýn Sport.