Höfðar til á­byrgðar olíu­fé­laga og segir verðið nú þegar ó­eðli­legt

Engin skipaumferð hefur verið um Hormússund síðan í gærkvöldi en Bandaríkjaher gerði í nótt árásir á skotmörk í Íran og segja þær svar við árásum Írana á flutningaskip. Eftir lækkanir í kjölfar samkomulags um vopnahlé hefur heimsmarkaðsverð á olíu hækkað á ný í ljósi stöðunnar og verð á Brent-hráolíu hækkaði til að mynda um 4,5 prósentustig í morgun.

Runólfur Ólafsson, framkvæmdastjóri Félags íslenskra bifreiðaeiganda segir þetta áhyggjuefni. „Þetta er auðvitað ömurleg þróun og eitthvað sem við höfum því miður enga stjórn á.“

Haldi verð áfram að hækka telur Runólfur telur þó að íslensku olíufélögin hafi svigrúm til þess að halda aftur af hækkunum til neytenda. Það komi til að mynda bersýnilega í ljós í nýlegu skjali Samkeppniseftirlitsins um eldsneytismarkaðinn þar sem fram kemur að álagning hafi á síðustu árum verið há í sögulegu samhengi og að verðmnur í samanburði við önnur Evrópuríki hafi aukist markvert.

„Það er bara greinilegt í þeim tölum sem eru fyrirliggjandi að íslenskir neytendur eru að borga hærra verð en eðlilegt væri miðað við það sem við sjáum í nágrannalöndum,“ segir Runólfur. 

„Auðvitað eru skattar mismunandi í hverju landi fyrir sig en álagning er hluti af verðmyndun og hér erum við að horfa upp á það að álagning á bensíni hefur verið að stighækka allt frá covid-tímanum og hefur það sem af er ári verið í hæstu hæðum. Það finnst manni skjóta skökku við í ljósi þess að það er allavega einhver viðleitni hjá öðrum í samfélaginu til þess að halda verðlagi innan eðlilegra marka svo ekki sé verið að bæta á verðbólgubálið. Og ég bara ákalla þessi fyrirtæki um að sýna meiri sanngirni.“

Þá telur hann eðlilegt að stjórnvöld skoði það að framlengja tímabundna lækkun á virðisaukaskatti á eldsneyti.

„Það á að renna út í lok næsta mánaðar þannig það þarf bara að skoða hvernig ástandið verður og hvaða áhrif það hefur á heimsmarkaðsverð.“