Albert um KA: „Eins og þú hafir verið fullur í Foot­ball Mana­ger“

KA tapaði sínum fimmta leik í röð í Bestu deildinni á sunnu­daginn síðastliðinn gegn Stjörnunni. Lokatölur í Garða­bænum urðu 3-1 Stjörnunni í vil. KA vermir nú 10. sæti Bestu deildarinnar og er aðeins þremur stigum frá fallsæti. Aðeins sótt tíu stig af 36 mögu­legum í fyrstu tólf um­ferðum deildarinnar.

„Dani­jel Dejan Djuric og Oli­ver Heiðars­son eru leik­mennirnir sem KA-menn settu peningana í og ætluðu bara að treysta á að liðið myndi skora fleiri mörk núna og bæta varnar­leikinn seinna. En þessir leik­menn hafa heldur betur ollið von­brigðum,“ sagði Albert Brynjar, einn af sér­fræðingum Stúkunnar.

„Ég var mjög spenntur fyrir kaupum KA á Djuric og hef enn mikla trú á honum hjá KA sem og Oli­ver. Þetta eru leik­menn á fínum aldri. Þegar að þeir finna sitt lið þá hefur maður enn trú á því að þetta muni smella hjá þeim. Það þarf að brjóta ísinn.

Fyrir tíma­bilið var Ívar Örn Árna­son, fyrir­liði KA liðsins í fyrra, seldur til Breiða­bliks og var liðið styrkt með fjölda leik­mann á miðsvæði sem og fram á við. Albert er ekki hrifinn af því hvernig liðið er sam­sett.

„Fyrir mitt leyti lítur þetta út eins og þú hafir verið fullur í Foot­ball Mana­ger, vaknað daginn eftir og séð að þú seldir fyrir­liðann þinn og gleymdir að kaupa varnar­menn í staðin. Án gríns. Þetta er svo illa sam­sett lið. Það er málið.“

Um­ræðuna um KA í Stúkunni frá því í gær má sjá í heild sinni í spilaranum hér ofar í fréttinni.