„Í mínum huga var þessi dagur full­kominn“

Hjónin hafa verið par í rúmlega átta ár og voru heldur róleg í skipulagi á veislunni. Blaðamaður ræddi við Marín um stóra daginn.

Hvenær og hvernig trúlofuðust þið?

Hannes bað mín síðasta sumar þegar við vorum í Kaupmannahöfn. Það var mjög óvænt og fallegt, sérstaklega þar sem bónorðið var borið upp í borginni minni þar sem ég bjó í ellefu ár.

Hvað voruð þið búin að vera lengi að skipuleggja stóra daginn?

Við vorum ef til vill aðeins of róleg í upphafi, enda gerðum við okkur ekki grein fyrir því hversu langt fram í tímann fólk pantar veislusali, jafnvel allt að tveimur árum áður. 

Við skoðuðum meðal annars þann möguleika að halda brúðkaup erlendis með allra nánustu, en þar sem við eigum bæði stórar fjölskyldur varð fljótt ljóst að það hentaði okkur ekki. Okkur langaði að geta boðið sem flestum og ákváðum því að lokum að gifta okkur hér heima.

Hvernig var brúðkaupsdagurinn?

Hann var eins og draumur og fór langt fram úr öllum mínum væntingum. Í mínum huga var þessi dagur fullkominn og það er ekki aðeins vegna þess að ég var að giftast ástinni minni. Það er fyrst og fremst öllu því frábæra fólki að þakka sem lagði sitt af mörkum til að gera daginn svona einstakan og ógleymanlegan.

Ég hóf daginn í Makeup-Studio Hörpu Kára ásamt mínum nánustu konum; dætrum mínum, systur, mágkonu, mömmu, tengdamömmu og bestu vinkonum. Harpa Kára vinkona mín sá um förðunina mína af mikilli fagmennsku og Katrín töfraði fram fallega hárgreiðslu. Sigrún Sig og Sara Eiríks sáu um hár og förðun hinna damanna, á meðan vinkona mín Sæunn og Alba Mist dekruðu við yngstu dóttur okkar. 

Á sama tíma naut Hannes góðra stunda með strákunum okkar á Parliament hótelinu. Synir okkar gegndu mikilvægu hlutverki sem svaramenn við athöfnina, þar sem feður okkar beggja eru fallnir frá, og dætur okkar voru yndislegir hringaberar. Þetta gerði daginn enn persónulegri og hjartnæmri fyrir okkur öll.

Hvar hélduð þið brúðkaup? 

Séra Guðrún Karls Helgudóttur biskup gifti okkur í Háteigskirkju og vorum við bæði á því að sú kirkja yrði fyrir valinu. Sú kirkja ber sögu í okkar fjölskyldu. Fordrykkinn héldum við á Parliament hótelinu og veislan var í Sjálfstæðissalnum á Parliament hótelinu. Salurinn bauð upp á allt sem við vorum að leitast eftir.

Voruð þið sammála í skipulaginu?

Við vorum mjög sammála. Ég skipulagði og hann sagði já við flestu.

Hvað fannst ykkur mikilvægast?

Okkur fannst mikilvægt að hafa þennan dag algjörlega eftir okkar höfði. Fólk var einnig duglegt að koma með hugmyndir sem ég kann virkilega að meta. En allra mikilvægast var að börnin okkar tækju sem mestan þátt í deginum með okkur.

Hvaðan sóttuð þið innblástur?

Um leið og ég fór að skoða Pinterest þá sá algorytminn um að leiða mig áfram í hugmyndavinnu. Ég vildi hafa allt mjög stílhreint og svart og hvítt litaþema. Pínulítið í „Old Hollywood“ stíl. Fyrir utan brúðarbílinn sem var bleikur og hvítur og er frá í kringum 1950.

Hvað stendur upp úr?

Augnablikið þegar við sáum hvort annað þegar ég labbaði inn kirkjugólfið er einhvern veginn ólýsanleg tilfinning og þar er óhætt að segja að það hafi lekið nokkur gleðitár hjá okkur báðum við það augnablik. Veðrið lék svo við okkur um daginn og þegar við mættum í veisluna voru gestirnir búnir að raða sér upp þannig að við gengum í gegnum allan hópinn undir saxafónleik.

Veislan sjálf var dásamleg þar sem margir héldu ræður og þar á meðal öll börnin okkar sem bræddu hjörtu okkar með svo fallegum orðum. Síðar um kvöldið var slegið upp partýi þar sem frábært tónlistarfólk sá um að gera stemminguna ógleymanlega það sem eftir lifði kvöldsins.

Sáu einhverjir um veislustjórn og voru skemmtiatriði?

Það fylgir því mikil vinna og skipulag að halda stórt brúðkaup og ég er óendanlega þakklát öllu því fólki sem studdi okkur á leiðinni, veitti okkur pepp, sýndi skilning og réttu fram hjálparhönd þegar á þurfti að halda. Við völdum veislustjórana úr vinahóp okkar og voru þeir með allt fullkomlega á hreinu og stýrðu deginum af fagmennsku og glæsibrag frá upphafi til enda. Ég veit ekki hvernig við hefðum gert þetta án þeirra.

Skreytingaþjónustan sá um allar skreytingar og blómaskreytingar og breytti salnum í nákvæmlega þá draumsýn sem við höfðum séð fyrir okkur. Starfsfólkið á Parliament hugsaði einstaklega vel um okkur og gestina alla, tæknimaðurinn á hrós skilið fyrir sitt framlag og svo voru það ræðurnar, skemmtiatriðin og fólkið okkar sem gerðu daginn ógleymanlegan. Það er eiginlega spurning hversu langan tíma það tekur að lenda aftur á jörðinni eftir svona upplifun. 

Eitt er þó víst, brúðkaup eru einfaldlega lang bestu veislurnar.

Var eitthvað sem kom ykkur á óvart?

Aðallega hversu hratt dagurinn leið.

Hvað voru margir gestir?

Það voru rúmlega 150 manns í veislunni svo salurinn var fullur af okkar nánasta fólki. Við hefðum viljað bjóða fleirum en það er alltaf erfitt að draga línuna þegar við erum með svona fjölmennt brúðkaup.

Hvernig gekk að velja brúðkaupsfötin og hvaðan sóttirðu innblásturinn fyrir það?

Ég og dóttir mín, Alba Mist, fórum saman í verslunina Loforð að skoða brúðarkjóla. Um leið og hún kom auga á þennan kjól benti hún á hann og sagði: „Mamma, þetta er kjóllinn.“ Þetta var fyrsti kjóllinn sem ég mátaði og hann passaði fullkomlega. Um leið og ég fór í hann gat ég ekki hætt að brosa.

Kjóllinn var allt annar en sá sem ég hafði ímyndað mér fyrirfram, en þegar ég sá mig í honum vissi ég að enginn annar kæmi til greina. Alba Mist valdi kjólinn og með örlitlum breytingum frá þeim hjá Loforð varð hann nákvæmlega sá draumakjóll sem ég hafði ekki einu sinni vitað að ég væri að leita að. Hannes átti sjálfur smoking en leigði svo hvítan jakka hjá Loforð aukalega.

Ertu með eitthvað gullið ráð fyrir verðandi hjón sem eru að skipuleggja brúðkaup?

Munið að njóta allra augnablikanna því dagurinn líður einfaldlega of hratt.

Ætlið þið í brúðkaupsferð?

Já við munum fara í brúðkaupsferð en fyrst langar okkur að fagna fimmtíu ára afmæli Hannesar með börnunum okkar svo það er afmælisferð á næsta leiti.