Hækka verð­launa­fé um tuttugu prósent

Þetta er langstærsta hækkun verðlaunafjár á Wimbledon frá því það hóf göngu sína árið 1877. Leikmenn sem vinna einliðaleik kvenna og karla fá 3,6 milljónir punda sem gera rétt rúmlega 600 milljónir íslenskra króna.

Stærstu stjörnur tennisheimsins mótmæltu hve lítið verðlaunafé fer til leikmanna með því að tala ekki lengur en í fimmtán mínútur í viðtölum á Opna franska mótinu sem er nýliðið. Fimmtán mínúturnar var tilvitnun í þau fimmtán prósent af tekjum mótsins sem fara í verðlaunafé.

Stjórn All England klúbbsins sem heldur Wimbledon mótið segir að þetta sé stór launahækkun fyrir leikmenn. Stjórnin vonar að leikmenn átti sig á því hversu stór launahækkunin er.

Leikmenn sem detta út úr fyrstu umferð mótsins fá að launum 80.000 pund í laun sem er rétt undir þrettán og hálfri milljón íslenskra króna. Fyrir hækkunina fengu leikmennirnir 66.000 pund sem eru um ellefu milljónir íslenskra króna.