Lækkunin skilaði sér hjá öllum nema Costco

Í apríl samþykkti ríkisstjórnin að lækka tímabundið virðisaukaskatt á eldsneyti af dælu úr 24 prósentum í 11 prósent. Markmiðið með aðgerðunum hafi verið að hemja verðbólgu og bregðast við verðhækkunum á olíu vegna stríðsátaka við Persaflóa.

Samkeppniseftirlitinu var falið að vakta útsöluverð eldsneytis sérstaklega og tók hagdeild ASÍ sig til og athugaði bensínverð á 246 afgreiðslustöðvum sex smásala eldsneytis. Niðurstöðurnar leiddu í ljós að lækkunin skilaði sér að fullu hjá Atlantsolíu, N1, Olís, Orkunni og ÓB.

„Orkan reið á vaðið og lækkaði verð á sínum stöðvum strax í kjölfar gildistöku laganna. Lækkanir annarra skiluðu sér síðar, og þá jafnan að fullu,“ segir í tilkynningu ASÍ.

Álagning hafi verið sögulega há

„Mat á hlut olíufélaganna í hverjum seldum lítra bendir til þess að álagning hafi almennt farið lækkandi síðustu vikur,“ segir í tilkynningunni.

Hins vegar er bent á það mat ASÍ að álagning á eldsneyti hafi verið sögulega há í aðdraganda upptöku kílómetragjalds og lækkunar vörugjalda. 

„Lækkunin fellur að hluta til saman við gildistöku tímabundinnar lækkunar virðisaukaskatts á eldsneyti í lok apríl. Þó ber að hafa í huga að þróun eldsneytisverðs ræðst einnig af öðrum þáttum, svo sem heimsmarkaðsverði og gengi krónunnar. Sveiflur milli vikna og fyrirtækja eru því áfram nokkrar.“