Mætti brjálaður til leiks eftir að hafa misst af verð­launum

Victor Wembanyama taldi sig verðugan verðlauna sem besti leikmaður tímabilsins (MVP) en horfði á Shai Gilgeous-Alexander, leikmann OKC, taka við verðlaununum fyrir leik næturinnar.

Það virðist hafa kveikt rækilega í Wembanyama sem skoraði 41 stig og tók 24 fráköst í sigri Spurs eftir æsispennandi leik. Hann er yngsti leikmaður í sögu NBA-deildarinnar (22 ára og 134 daga gamall) til að ná 40 stigum og 20 fráköstum í leik í úrslitakeppninni.

Hann er þá fyrsti leikmaðurinn sem nær 40 stigum og 20 fráköstum í frumraun í úrslitaeinvígi um deildartitil frá því að Wilt Chamberlain afrekaði það árið 1960.

Aðspurður hvort það hafi kveikt í honum að sjá Gilgeous-Alexander taka við verðlaununum fyrir leik sagði Wembanyama: „Já, klárlega.“

Mitch Johnson, þjálfari Spurs, segir það einnig hafa spilað inn í frammistöðu Wembanyama.

„100 prósent. Hann er keppnismaður. Hann sá annan taka við verðlaunum sem hann átti sjálfur skilið.“

Gilgeous-Alexander skoraði 23 stig, gaf tólf stoðsendingar og stal boltanum fimm sinnum í leiknum. Hann var aftur á móti aðeins með skotnýtingu upp á rúm 30 prósent og átta af 24 stigum hans komu af vítalínunni.

„Við þurfum að vera betri, þá sérstaklega ég,“ sagði Gilgeous-Alexander, sem er aðeins fjórtándi leikmaður í sögu NBA-deildarinnar til að vinna MVP-verðlaunin tvisvar í röð, eftir leik.

„Ég þarf að vera betri, sérstaklega gegn liði með þessi gæði. Þetta er ekki flóknara en það,“ bætti hann við.

Fyrsti leikur í úrslitaeinvígi Austurdeildarinnar fer fram í nótt, milli New York Knicks og Cleveland Cavaliers í Madison Square Garden.

Spurs og Thunder eigast við annað kvöld, aftur í Oklahoma.