Á­fall fyrir Grinda­vík: Kane og Óli meiddir og ekki með í kvöld

Liðin mætast í Síkinu á Sauðárkróki í kvöld og stendur einvígið 2-1 Grindavík í vil og ljóst að með sigri þeirra verður liðið Íslandsmeistari. Sigur Tindastóls mun hins vegar knýja fram oddaleik. 

Stefán Árni Pálsson greindi frá tíðindunum í Sportpakkanum á Sýn en hann er staddur í Síkinu ásamt sérfræðingateymi Körfuboltakvölds.

Um mikið áfall er að ræða fyrir Grindavík. Kane er einn allra besti leikmaður Bónus deildarinnar og Ólafur algjör leiðtogi liðsins, hefur verið það um árabil. 

Óvíst er á þessari stundu hvers eðlis meiðslin eru og hvort þau muni halda leikmönnunum tveimur frá í einhvern tíma. 

„Þeir eru bara ekki leikfærir,“ sagði stuttorður Jóhann Þór Ólafsson, þjálfari Grindavíkur í viðtali fyrir leik við Andra Má Eggertsson.  

Leikur liðanna hefst klukkan korter yfir sjö og er sýndur í beinni á Sýn Sport Ísland, upphitun hefst núna klukkan hálf sjö.