Kim tekur sér pásu frá lög­fræðinni

Dægurmálamiðillinn TMZ greinir frá þessu en heimildarmenn miðilsins herma að Kim hafi sleppt því að taka prófið í febrúar og ætli ekki að taka það í júlí en það er hægt að taka það tvisvar á ári.

Kim muni því ekki reyna aftur við prófið fyrr en 2027 þannig eitthvað ætlar að teygjast meira á þessu lögfræðiferðalagi hennar. Kim hefur þó sjálf ekkert tjáð sig um málið.

Féll ítrekað, útskrifaðist og féll svo aftur

Lögmannsréttindum í Bandaríkjunum er háttað þannig að maður þarf að þreyta próf í hverju ríki fyrir sig til að geta starfað þar sem lögmaður. Kim tók prófið í Kaliforníu í fyrra og greindi svo frá því í nóvember að hún hefði ekki náð því.

„Ég held áfram á fullu þar til ég næ prófinu. Ég ætla ekki að stytta mér leið eða gefast upp – bara halda áfram að læra og leggja hart að mér,“ sagði hún þá á samfélagsmiðlum.

Það var í fyrsta skiptið sem Kim tók prófið en hún hafði náð svokölluðu „baby bar“-prófi, sem er í raun próf laganema á fyrsta ári, árið 2021 eftir að hafa fallið á því þrisvar á tveimur árum. Hún lauk síðan lögfræðinámi sínu í maí í fyrra eftir sex ára nám og fylgdi þar í fótspor föður síns, stjörnulögfræðingsins Roberts Kardashian.

Sjá einnig: Kim náði lög­fræði­prófinu í fjórðu til­raun

En þó hún verði ekki lögmaður í bráð fær hún að leika slíkan í sjónvarpsþáttunum All's Fair sem voru sýndir á Disney+ síðasta haust og fengu hörmungardóma hjá gagnrýnendum. Áhorfendur tóku þó vel í þættina og í nóvember 2025 var tilkynnt að það kæmi önnur sería.