Súperdósin snýr aftur

Nýja súperdósin kemur í sérstökum HM umbúðum í tengslum við heimsmeistaramótið í knattspyrnu og verður fáanleg bæði sem Coca-Cola Original Taste og Coca-Cola Zero Sugar.

Fyrsta 500ml Coca-Cola dósin kom á markað hér á landi í kringum árið 1990 og varð fljótt ein vinsælasta umbúðastærð landsins. Vakti sérstaka athygli að til að byrja með var súperdósin ódýrari en 330ml dósin sem áfram var seld samhliða. Súperdósin skipaði sér sérstakan sess í íslenskri gosmenningu og tengja margir hana við samverustundir, ferðalög, íþróttaviðburði og nostalgíu frá liðnum árum.

„Það er með mikilli gleði sem við kynnum súperdósina á ný fyrir íslenskum neytendum. Súperdósin á sérstakan stað í hugum margra landsmanna og við höfum ítrekað fengið fyrirspurnir og beiðnir um að fá hana aftur í hillur verslana. Nú er loksins komið að því,“ segir Atli Sigurður Kristjánsson, framkvæmdastjóri markaðssviðs Coca-Cola á Íslandi í tilkynningu.

Endurkoma súperdósarinnar er jafnframt sögð liður í áframhaldandi þróun á vöruframboði Coca-Cola á Íslandi þar sem lögð er áhersla á fjölbreyttari valkosti fyrir neytendur. 

„Undanfarið hafa viðtökur á hinu koffínlausa Coca-Cola Zero Zero farið fram úr björtustu vonum en varan seldist upp á mettíma eftir að hún kom á markað í nýju útliti. Mikill áhugi neytenda á sykurlausum og koffínlausum valkostum undirstrikar sterka stöðu Zero-fjölskyldu Coca-Cola og breyttra neysluvenja íslenskra neytenda.“

Varan mun fara í dreifingu á næstu dögum og verður fáanleg hjá verslunum og samstarfsaðilum um land allt. Súperdósin verður ekki sú eina í 500mL stærð en Pepsi Max hefur verið selt í þeirri stærð hér á landi undanfarin ár.