Faðir leik­manns Grinda­víkur gagn­rýnir liðið: „Fyrir neðan allar hellur“

„Jæja á maður að þegja? Nei!!!! Skipulag Grindavíkurliðsins er fyrir neðan allar hellur!!!,“ skrifar Helgi í færslu á samfélagsmiðlinum Facebook í kvöld eftir sex stiga tap Grindavíkur gegn Val, 85-79, en úrslitin gera það að verkum að liðin munu mætast í oddaleik í Grindavík þar sem í boði verður sæti í úrslitaeinvígi Bónus deildarinnar. 

Helgi er þungavigtarmaður í sögu körfuboltans í Grindavík en hann varð bæði Íslandsmeistari sem leikmaður Grindavíkur árið 1996 og sem þjálfari liðsins árið 2012. 

Þá varð hann í þrígang bikarmeistari með Grindavík sem leikmaður og einu sinni sem þjálfari. Í þrígang var hann valinn í úrvalslið efstu deildar og í tvígang valinn besti leikmaðurinn, tímabilin 1998 og 2003.

Með sigri á Hlíðarenda í kvöld hefði Grindavík tryggt sér sæti í úrslitaeinvígi Bónus deildarinnar en nú er orðið ljóst að bæði undanúrslitaeinvígi deildarinnar fara í oddaleik. 

Oddaleikirnir fara fram á miðvikudaginn næstkomandi. Annars vegar tekur Tindastóll á móti Stjörnunni í Síkinu á Sauðárkróki og hins vegar mun Grindavík taka á móti Val í Grindavík. Báðir oddaleikir undanúrslitanna verða sýndir í beinni útsendingu á sportrásum Sýnar.