Gjald­skylda sett á við Egils­höll

Í fréttatilkynningu frá Heimum, eiganda Egilshallar, segir að innheimt verði fyrir bílastæðin næst húsinu eftir fyrstu fimmtán mínúturnar en hægt verði að leggja farartækinu sínu í þrjár klukkustundir gjaldfrjálst á almennu bílastæðunum.

Eftir það kostar bílastæðið 450 krónur á klukkustund.

„Á undanförnum misserum hefur það reynst mörgum erfitt að finna bílastæði við Egilshöll á álagstímum. Ástæðan er meðal annars sú að stæðin hafa verið nýtt til langtímageymslu á bílum, ferðavögnum og fleiru án leyfis, auk þess sem starfsfólk hefur í sumum tilfellum fyllt stæðin sem eru næst inngöngum Egilshallar,“ segir í fréttatilkynningunni.

Nýja kerfið byggir á sjálfvirkri númeraplötugreiningu svo ef dvalið er lengur en frítíminn leyfir verður að greiða fyrir stæðið með snjallforriti, QR-kóða eða í greiðsluvél á staðnum. Green Parking sér um rekstur kerfisins og verður séð til þess að starfsfólk leggi áfram frítt, á ákveðnum stöðum bílastæðisins.