Greindi allt fía­skóið í Grinda­vík: „Aug­ljóst að hann er ekki að slást við dómarann“

Eftir frækinn sigur Njarðvíkur gegn Grindavík í fyrsta leik liðanna í 8-liða úrslitum Bónus-deildar karla í körfubolta hefur þó aðallega verið ritað og rætt um ólætin undir lok leiks. Upp úr sauð þá á milli leikmanna svo lá við hópslagsmálum og þá ruddust áhorfendur einnig inn að vellinum.

Í Körfuboltakvöldi á Sýn Sport Íslnad í gærkvöld fór Davíð ítarlega yfir helstu atvikin og sagði alveg ljóst að dómarar leiksins hefðu ekki komist að réttri niðurstöðu, eins og sjá má í spilaranum hér að neðan.

Davíð byrjaði á að fara yfir lokaniðurstöðu dómaranna sem hann sagði ekki rétta:

„Lokaniðurstaðan er sú að Dwayne Lautier fær dæmda á sig sóknarvillu, síðan er dæmd óíþróttamannsleg villa á Kristófer Breka, Luwane Pipkins og Jordan Semple. Síðan er dæmd brottrekstrarvilla á Dominykas Milka og síðan er þremur mönnum af bekkjum liðanna vikið af velli fyrir að koma inn á leikvöllinn.“

Davíð sagði ljóst að Lautier, sem í raun hóf öll ósköpin með sínu broti, hefði átt skilið óíþróttmannslega villu. Hann var sammála því að Kristófer Breki og Pipkins skyldu hafa fengið óíþróttmannslega villu en vildi sjá Semple fá þyngri refsingu.

„Fyrir mér ætti Jordan Semple að vera vikið af velli fyrir ofsafengna hegðun og líka aðeins þyngri hrindingu en það sem var í gangi hjá hinum. Fyrir mitt leyti er eðlismunur á þessum hrindingum.“

Davíð vildi þó ekki ganga eins langt og sumir sem talið hafa Semple ráðast á dómara:

„Einhverjir hafa talað um að Jordan Semple sé þarna að ráðast á dómarann. Fyrir mér er það bara þvæla. Það er augljóst að hann er ekki að slást við dómarann. Hann er bara búinn að missa stjórn á hegðun sinni, dómarinn kemur á milli og það þarf bara aðeins að róa hann niður. Það er aldrei hætta á því að hann vaði í dómarann og fyrir mitt leyti á sú umræða ekki heima í þessu umtali öllu.“

Þá velti Davíð fyrir sér hvort að Milka hefði átt að sleppa við brottrekstrarvillu, vegna hegðunar sinnar í garð áhorfenda, í ljósi þess að þeir höfðu brotið sér leið í átt að vellinum. Davíð hefði sjálfur látið Milka sleppa en var hins vegar alveg sammála dómurunum um að víkja af velli þeim þremur sem komu af varamannabekkjum liðanna til að taka þátt í látunum, enda reglurnar um slíkt skýrar.

Davíð lauk svo sínu máli á að benda á að allar ákvarðanirnar hefðu í raun átt að núllast út og enginn þar af leiðandi átt að fara á vítalínuna, öfugt við það sem gerðist í leiknum, en yfirferð hans í heild má sjá hér að ofan.