Munaðarlausi apinn í Japan farinn að hafa á­hrif á Ís­landi

Tuskudýrið, sem er órangútan, virðist ekki vera neitt ýkja merkilegt en staðreyndin er sú að víðsvegar í Ikea verslunum um heim allan er það uppselt og bangsinn fer sumstaðar á Ebay á tugi þúsunda. Þessar vinsældir má þakka hinum japanska makakíapa Punch sem fæddist í júlí í dýragarði í Japan og var yfirgefinn af móður sinni stuttu seinna.

Starfsmenn dýragarðsins gáfu honum þá tuskudýrið úr Ikea og úr varð einstakt samband sem vakið hefur heimsathygli á samfélagsmiðlum. Svo mikla athygli að tuskudýrið selst nú eins og heitar lummur og vinsældirnar hafa náð til Íslands.

Meiri áhugi

„Apinn hefur alltaf verið eitt vinsælasta mjúkdýrið okkar, við höfum vissulega séð aukningu í sölu, þannig það þarf engum blöðum að fletta um það,“ segir Birna Bogadóttir verslunarstjóri Ikea á Íslandi.

Birna segir auknar vinsældir tuskudýrsins eiga sér nokkrar birtingarmyndir. „Við höfum fengið nokkrar fyrirspurnir, við höfum líka séð krakka vera að benda á hann: Hey, hér er apinn, svo er apafjöskyldan líka stærri, það er ekki bara þessi hérna, það eru fleiri apar eins og þssi hérna og svo er svarti apinn sem við erum líka með hérna, þannig fullt af skemmtilegum öpum.“

Og Ikea á heimsvísu hefur nýtt einstakt samband japanska apans og tuskudýrsins óspart á samfélagsmiðlum sínum. Birna segir starfsfólk Ikea hugsa munaðarlausa apans með hlýju.

„Þetta bræðir mann alveg, bæði að sjá vinasambandið á milli svo er þetta gott fyrir Ikea hjartað að sjá svona góðan apa. Við náttúrulega erum mjög von því hér að sjá litla krakka með apa í hönd og líka fullorðið fólk en það er sérstaklega sweet að sjá apa með apa.“