Í bann vegna lé­legrar tungu­mála­kunn­áttu eigin­mannsins

Millivegalengdahlauparinn tapaði máli sínu fyrir Alþjóðaíþróttadómstólnum (CAS) og þarf að taka út tveggja ára keppnisbann fyrir að hafa komið sér undan lyfjaprófi.

Welteji var sýknuð í heimalandi sínu í fyrra eftir að hafa verið kærð fyrir að gera sig ófáanlega fyrir lyfjapróf, en Eftirlitsstofnun frjálsíþrótta (AIU) sætti sig ekki við úrskurðinn og málinu var áfrýjað til CAS.

Nú hefur málið verið til lykta leitt og CAS kemst að þeirri niðurstöðu að Welteji hafi brotið gegn reglum um lyfjaeftirlit þegar lyfjaeftirlitsmenn þurftu að yfirgefa heimili hennar með óunnið erindi.

Hins vegar var talið að tungumálaörðugleikar hefðu átt þátt í því að eiginmaður hennar vísaði lyfjaeftirlitsmönnunum frá, og einnig var litið til þess að hún hafði áður gengist undir lyfjapróf átta sinnum utan keppni án þess að leggja hindranir í veg fyrir lyfjaeftirlitsmenn.

Þess vegna sleppur hún með tveggja ára bann í stað fjögurra. Að frádregnu því banni sem hún hefur þegar afplánað lýkur keppnisbanninu 30. júní 2027.