„Stoltur af kraftinum og eljunni sem við sýndum í kvöld“

„Þetta var mjög góð tilfinning og ég er stoltur af liðinu, stoltur af kraftinum og eljunni sem við sýndum í kvöld,“ sagði Hörður Axel Vilhjálmsson, þjálfari Keflavíkur, eftir að liðið fagnaði bikarmeistaratitli VÍS í kvöld.

Keishana Washington fór á kostum fyrir Keflavík í kvöld en Hörður hrósaði liðsheild Keflavíkur eftir leikinn og sagðist stoltur af öllum þeim leikmönnum sem komu að leiknum.

„Frammistaða liðsins var frábær, frammistaða einstakra leikmanna frábær og allar þær sem komu inn á völlinn bættu einhverju við og það er það sem við viljum standa fyrir. Þær sem komu ekki inn á völlinn í kvöld voru samt lifandi á bekknum og tóku þátt í því sem við erum að gera.“

Hörður var spurður hvort þessi sigur og bikarmeistaratitill gætu orðið liðinu innspýting í deildarkeppninni, þar sem liðið situr um miðbik hennar.

„Þetta gefur okkur bikarmeistaratitil og við ætlum að fagna því í kvöld. Restina af tímabilinu hugsum við um á morgun.“