Fyrstu mæðurnar sem eru sam­tímis í hópi tíu bestu í heimi

Hin 28 ára gamla Bencic eignaðist dóttur sína Bellu í apríl 2024 og svissneski leikmaðurinn hefur færst upp um eitt sæti í níunda sæti á nýjasta styrkleikalista WTA eftir ellefu mánaða fæðingarorlof.

Hin 31 árs gamla Svitolina eignaðist dótturina Skai í október 2022 en hún hefur færst upp um tvö sæti í það tíunda eftir að úkraínski leikmaðurinn komst í undanúrslit á Opna ástralska meistaramótinu í síðasta mánuði.

Nýbakaðar mæður sem snúa aftur á mótaröðina geta notað fyrri styrkleikalista sinn til að komast inn á tólf mót á þriggja ára tímabili frá fæðingu barns síns.

Bencic sagði að það að keppa aftur á hæsta stigi eftir fæðingarorlof væri eitthvað sem hún væri „ótrúlega stolt af“.

„Mjög fáir vita eða hafa upplifað hversu erfitt þetta ferli er en fjölskylda mín, teymið mitt og ég höfum lagt alla okkar orku, vinnu og alúð í það til að ná þessu markmiði,“ sagði fyrrverandi Ólympíumeistarinn Bencic.

Svitolina, sem hefur unnið nítján titla í einliðaleik og náði hæst þriðja sæti á heimslistanum árið 2018, sagði að það þýddi svo mikið fyrir hana að komast aftur á topp 10 sem móðir.

„Ég er stolt af baráttu minni og seiglu og ég get ekki þakkað aðdáendum nóg fyrir ótrúlegan stuðning,“ sagði Svitolina en hún er gift franska leikmanninum Gael Monfils.

Síðasta sumar bætti WTA við nýrri reglu þannig að kvenkyns leikmenn sem vilja frysta egg eða fósturvísa, til þess að geta stofnað fjölskyldu síðar, fá einnig styrkleikalista sinn varinn af mótaröðinni.

Á styrkleikalista karla hjá ATP tekur Novak Djokovic við þriðja sætinu af Alexander Zverev eftir að Serbinn komst í úrslitaleikinn í Melbourne.

Hinn 38 ára gamli Djokovic stefndi að því að vinna sinn 25. risatitil á sunnudag, sem hefði verið met, en tapaði í fjórum settum fyrir Carlos Alcaraz.

Spánverjinn heldur hins vegar fyrsta sætinu eftir að hafa orðið yngsti maðurinn til að fullkomna risaslemmuferil sinn, 22 ára að aldri, með sínum sjöunda risatitli.

Þjóðverjinn Zverev, sem tapaði fyrir Alcaraz í undanúrslitum, fellur niður í fjórða sæti, á meðan Ítalinn Jannik Sinner er áfram í öðru sæti eftir tap sitt í undanúrslitum gegn Djokovic.