Kona vann Ís­maraþonið á Suður­skauts­landinu í fyrsta sinn

Ástralski hlauparinn Catherine Drysdale kom fyrst í mark á þremur klukkustundum, 48 mínútum og 43 sekúndum og vann þar með alla keppendur á braut sem er alfarið á snjó og ís, tæplega þúsund kílómetrum frá suðurpólnum.

Þetta er ekki maraþon þar sem tíminn segir alla söguna. Aðstæður í ár voru langt undir frostmarki, með miklum vindi og síbreytilegu undirlagi. Hin ástralska drottnaði í ísköldum aðstæðum, átta gráðu frosti en vindkælingin þýddi að það var eins og hún væri að hlaupa í átján gráðu frosti. Hún var líka að hlaupa á mjög snjóþungri braut á Union-jökli á Suðurskautslandinu.

Frammistaða hennar var það góð að hún sigraði alla keppendur, karla og konur, með meira en sex mínútna mun.

Rússinn Denis Nazarov hreppti titilinn í karlaflokki og annað sætið í heildina (3:54:49 klst.), en Pólverjinn Joanna Drewnicka-Ogrodnik var þriðji íþróttamaðurinn yfir marklínuna (4:18:05 klst.), sem þýðir að konur skipuðu tvö af þremur verðlaunasætum. Victoria Grahn frá Bresku Kólumbíu lenti í fimmta sæti í heildina og var þriðja konan yfir marklínuna (4:25:22 klst.).

Heimsmetabók Guinness viðurkennir viðburðinn sem „syðsta maraþon jarðar“. Í 42,2 km hlaupi ársins í ár tóku þátt 23 konur og 30 karlar, þar á meðal Domitilia Dos Santos frá Portúgal, sem varð, sjötíu ára gömul, elsta konan til að ljúka Ísmaraþoninu á Suðurskautslandinu á tímanum 7:43:14 klst.

Brautarmet kvenna í maraþoninu er 3:29:16 klst, sett í fyrra af bandaríska hlauparanum Liesl Muehlhauser, sem lenti í þriðja sæti í heildina. Brautarmet karla, 2:53:33 klst., var sett af írska hlauparanum Sean Tobin árið 2022.

Það er heldur ekki auðvelt að komast í hlaupið: Þátttökugjaldið er um 24.000 evrur (yfir 3,5 milljónir króna) og dekkar það flutninga sem þarf til að keppa á einum afskekktasta stað jarðar.

Drysdale sigraði ekki bara í ofurmaraþoni. Hún sigraði í hlaupi sem fáir hlauparar fá tækifæri til að hefja og breytti sögu þess um leið.