Óli Óla: Við getum al­veg eins hrokkið upp af á morgun

„Þetta var skemmtilegt“, sagði Ólafur þegar ahann var spurður um stærð sigursins strax að leik loknum. 

„Það var mjög gott að klára þetta í hörkuleik við Keflvíkingana og mjög góður sigur. Ég er þreyttur og feginn að hafa náð að landa sigri hér í kvöld.“

Körfubolti er kannski ekki flóknasta íþrótt í heimi og svör Ólafs báru það með sér þegar hann var spurður út í hvað hafi skilað sigrinum.

„Bara varnarleikur. Enn og aftur. Við vorum að sýna á köflum hvað við erum góðir í vörn og svo á öðrum köflum hvað við getum við lélegir í vörn. Mér fannst við spila góðan varnarleik í svona 35 mínútur.“

Bæði Grindavík og Keflavík hafa metnað fyrir því að ná langt í vetur en það er bara nóvember. Telur Ólafur að þessi leikur sé mögulega forsmekkur að því sem gerist í vor?

„Nei, við getum alveg eins bara hrokkið upp af á morgun. Við erum bara með báðar fætur á jörðinni og erum sallarólegir. Það er gaman að vinna, við förum í alla leiki til að vinna en við erum með báða fætur á jörðinni.“

En er einhver hætta þá að fæturnir fari af jörðinni þar sem liðið er taplaust?

„Vonandi ekki. Það er undir okkur komið að halda þeim á réttum stað og sjá til þess að við séum að vinna í okkar hlutum og verða betri og betri.“