Ólöf mætti með Magnús upp á arminn

Um var að ræða brúðkaup Elsu Sólar Gunnarsdóttur og Hauks Karlssonar sem giftu sig í dómkirkjunni 25. október síðastliðinn og héldu veislu á Primavera í Marshall-húsinu.

Fjöldi góðra gesta mætti í brúðkaupið. Þeirra á meðal var nýkjörinn varaformaður Miðflokksins, Snorri Másson og eiginkona hans, Nadine Guðrún Yaghi, leikkonan Kristín Pétursdóttir var einnnig meðal gesta og spilaði tónlistarmaðurinn Aron Kristinn svo í kirkjunni.

Sérstaka athygli vakti að Ólöf Skaftadóttir mætti með Magnús Ragnarsson sem sinn „plús einn“ og virtust þau einkar lukkuleg saman. Sögusagnir hafa gengið um samband þeirra undanfarna mánuði og sambandið greinilega á því stigi að þau mæta óhrædd saman í brúðkaup.

Þó nokkur aldursmunur er á parinu, eða kvartöld. Ólöf er 37 ára, fædd 1988 og Magnús er 62 ára, fæddur 1963. En ástin spyr auðvitað ekki um aldur.

Fyrrverandi ritstjóri og fyrrverandi sjónvarpsstjóri

Ólöf Skaftadóttir hefur verið mikið í umræðunni síðasta rúma árið frá því hún byrjaði með hlaðvarpið Komið gott með vinkonu sinni, Kristínu Gunnarsdóttur. Hlaðvarpið hefur notið mikilla vinsælda og þær verið fengnar á hina ýmsu viðburði síðustu misseri.

Ólöf starfar hjá ráðgjafafyrirtækinu Athygli og hefur mikla reynslu af fjölmiðlum, var eitt sinn ritstjóri Fréttablaðsins og samskiptastjóri Samtaka Atvinnulífsins.

Magnús hefur ekki minni reynslu af fjölmiðlum. Hann sat í framkvæmdastjórn Símans frá 2014 til 2024 og sinnti þar stöðu sjónvarpsstjóra og framkvæmdastjóra miðla. Áður var hann sjónvarpsstjóri Skjásins, dótturfélagi Símans, frá 2004 til 2007.

Magnús sat einnig í stjórn Listaháskóla Íslands frá 2016 til 2024, hefur verið formaður Tennissambands Íslands frá 2023 og bauð sig fram til forseta ÍSÍ en laut í lægra haldi fyrir Willum Þór Þórssyni.

Þá er Magnús einnig leikari og sést reglulega í íslenskum sjónvarpsþáttum og kvikmyndum. Hann lék til að mynda Séra Jón í Ikíngut (2000), hefur leikið illmennið í myndunum um Algjöran Sveppa, var í stóru hlutverki í fyrstu seríu Ófærðar, Dimmu og Vigdísi.