„Verðum að þekkja okkar gildi“

Ísland mátti þola tap gegn Luka Dončić og félögum í 4. umferð Evrópumótsins. Ísland hefur tapað öllum leikjum sínum til þessa á mótinu.

„Ef maður fer í eitthvað tactical dæmi um þennan leik þá er það oft á mörgum stundum þar sem við erum að labba upp með boltann. Það er eitthvað sem gengur ekki á móti liði sem vill pósta upp, lappa upp og skjóta þriggja stiga skotum.“

„Við verðum að þekkja okkar gildi þegar við erum að spila. Það er að hlaupa á menn og vera með ákveðna orku. Það var of lélegur kafli. Það er eitthvað sem gengur ekki, verður að halda fókus í gegnum heilan svona leik. Ég er mjög ósáttur með það,“ sagði hinn 34 ára gamli Ægir Þór og hélt áfram.

„Hins vegar er ég mjög þakklátur að vera á þessu sviði, þakklátur að ná 100 leikjum og spila fyrir framan þessa áhorfendur. Vera með allt þetta starfslið og með þessum leikmönnum í liði. En hundsvekktur með þetta tap.“

Ægir Þór var í kjölfarið spurður út í stuðningsfólk Íslands sem hefur heldur betur vakið athygli á mótinu.

„Þetta er gæsahúð. Þetta er alls ekki sjálfgefið. Þetta atriði í þjóðsöngnum, þar sem slökkt er á tónlistinni og við klárum þjóðsönginn. Það er alveg einstakt. Svo þakklátur fyrir hópinn og við erum að spila þetta fyrir þau.“

Að endingu var Ægir Þór spurður hvort íslenska liðið hefði getað gert eitthvað öðruvísi.

„Það vantaði að finna einhverjar lausnir á Luka þarna í lokin. Hann tók allar réttu ákvarðanirnar, sama hvort hann skoraði sjálfur eða setti í hornið í þriggja stiga skot. Heilt yfir var Jón Axel (Guðmundsson) geggjaður á honum, fiskaði villur á hann og kom honum í vandræði sem hjálpaði okkur að vera nálægt því að sigra.“

„Þetta er það sem þú treystir á. Þeir voru með hæfileika og ákvarðanatöku í lokin sem kláraði þetta.“