„Ná­kvæm­lega það sem ég hef verið að sjá fyrir mér“

FH lagði Val að velli með 3-2 sigri í framlengdum undanúrslitaleik á Hlíðarenda í fyrradag og er á leið í bikarúrslitaleikinn þann 16. ágúst gegn annaðhvort Breiðablik eða ÍBV. 

Sömuleiðis er FH í toppbaráttu Bestu deildarinnar, í öðru sæti, aðeins þremur stigum frá toppnum.

Árangur FH í sumar hefur komið mörgum á óvart, en ekki þeim sem hafa tekið þátt í uppbyggingu liðsins undanfarin ár.

„Við erum fyrst og fremst bara með mikið af leikmönnum sem eru rosalega góðar í fótbolta, með góða tækni, nútímaleikmenn. Svo erum við búnar að vera í svakalegu prógrammi hjá styrktarþjálfaranum okkar síðustu ár, þannig að við erum með líkamlega burði sem ekkert endilega öll lið hafa og náum að keyra leikinn hratt“ segir Arna.

Þegar Arna kom í Kaplakrikann fyrir rúmum tveimur árum var FH nýliði í efstu deild, langt frá þeim stað sem liðið er á í dag.

„Ég man ennþá eftir því þegar ég kom hingað á fyrsta fundinn með þjálfurunum. Þeir seldu mér einhverja vegferð og pælingu sem þeir vildu fylgja og mér fannst henta mér vel. Þannig að þetta er nákvæmlega það sem ég hef verið að sjá fyrir mér“ segir Arna um uppbyggingu FH síðan hún gekk til liðs við félagið.

Lítið rætt leikinn við systur sínar

Arna var áður leikmaður Vals og þar spila tvær af þremur systrum hennar, þær öfunda Örnu eflaust af velgengninni með FH, en hún segir bikarsigurinn ekkert sætari fyrir vikið.

„Það var bara gaman, ég hef svosem ekkert mikið rætt leikinn við systur mínar, ég faðmaði þær bara eftir leik og svo heldur lífið áfram...

...Elsta systir mín, Málfríður, er náttúrulega Valsari algjörlega út í gegn. Fyrir utan eitt ár í Danmörku hefur hún aldrei spilað fyrir annað félag. Valsari númer eitt, tvö og þrjú, þannig að ég held að hún myndi aldrei öfunda neinn í nokkru öðru liði en Val.

Svo er litla systir mín að eiga sitt breakout season núna með Val, ég held að þeim líði bara mjög vel þar“ segir Arna um systur sínar í Val, sem eru dottnar út úr bikarnum og langt frá toppbaráttu Bestu deildarinnar.