Hluta­bréfin rjúka upp eftir að Sweeney fór í galla­buxurnar

Auglýsingaherferðin, sem fór í loftið í gær, gengur undir nafninu „Sydney Sweeney á frábærar gallabuxur“ og er hluti af haustlínu American Eagle sem inniheldur gallajakka og „Sydney gallabuxurnar“ auk annars klæðnaðar.

Herferðin virðist mælast vel fyrir því hlutabréf American Eagle hækkuðu um 6,2 prósent áður en markaðir lokuðu á miðvikudag. Eftir lokun héldu bréfin áfram að hækka og stendur hækkunin nú í 14,6 prósentum.

 Markaðir opna vestanhafs um hálf tvö að íslenskum tíma svo það verður áhugavert að sjá hver staðan verður og hvort hún muni breytast mikið.

Herferðin með Sweeney virðist ætla að vera umfangsmikil. Fyrir utan kvikmyndaðar auglýsingar og ljósmyndir verða risavaxin auglýsingaskilti í þrívídd, sérstök Snapchat-linsa þar sem Sweeney ræðir við notendur og gervigreindar-tól sem auðvelda viðskiptavinum að skoða buxurnar gegnum netið.