Glódís byrjar gegn Serbum á þrjá­tíu ára af­mælis­degi sínum

Leikurinn hefst klukkan fimm, honum verður lýst í beinni textalýsingu hér á Vísi, og er fátt sem kemur á óvart í byrjunarliði Íslands.

Cecilía Rán Rúnarsdóttir stendur á milli stanganna í markinu og fyrir framan hana í fjögurra manna varnarlínu er að finna Guðrúnu Arnardóttur og Guðný Árnadóttur í bakvarðastöðunum og í hjarta varnarinnar eru landsliðsfyrirliðinn Glódís Perla Viggósdóttir, sem fagnar þrjátíu ára afmæli sínu í dag, og Ingibjörg Sigurðardóttir. 

Þriggja manna miðjan samanstendur af Hildi Antonsdóttur, Alexöndru Jóhannsdóttur og Karólínu Leu Vilhjálmsdóttur. 

Fyrir framan þær í fremstu línu eru svo Hlín Eiríksdóttir og Sveindís Jane Jónsdóttir á köntunum. Sandra María Jessen leiðir svo sóknarlínuna.