Sjáðu allan þáttinn um Norðurálsmótið

Þátturinn var sýndur á Sýn Sport í gærkvöld og nú má sjá hann í heild hér að neðan eða í efnisveitunni Sýn+ þar sem einnig má finna fyrri þætti.

Norðurálsmótið fagnaði fjörutíu ára afmæli í ár. Gleðin hófst á þjóðhátíðardaginn þegar krakkarnir í 8. flokki fengu smjörþefinn af stóra mótinu með því að spila á eins dags móti. Í þeim hópi voru nokkrir hressir KR-ingar sem höfðu ýmislegt að segja við Andra:

„Á ég að segja þér eitt? Einu sinni vann ég 16-0 á æfingu,“ sagði einn.

„Veistu hvað, ég var að skora eitt mark,“ bætti annar við.

„Og ég var að reyna að skora en ég gat það ekki,“ sagði sá þriðji.

Krakkarnir í 7. flokki tóku svo við og spiluðu á þriggja daga gistimóti þar sem stjörnur framtíðarinnar léku listir sínar í vöggu fótboltans á Akranesi. 

Ætla má að fjöldi fólks í bænum hafi tvöfaldast á meðan á mótinu stóð en allt gekk vel og þó að veðrið hafi sett smástrik í reikninginn nutu krakkarnir sín í botn, hvort sem var á vellinum, í mat í íþróttamiðstöðinni eða á kvöldskemmtun.