Allir hræðist Gísla Þor­geir: „Þekktasta nafnið í hand­bolta­heiminum“

Mögnuð frammistaða Gísla Þor­geirs á úr­slita­helgi Meistara­deildarinnar í hand­bolta fyrir rúmri viku síðan vakti tölu­verða at­hygli. Eftir að hafa næstum því ekki geta tekið þátt í úr­slita­helginni vegna meiðsla steig Gísli Þor­geir upp og var marka­hæsti leik­maðurinn í úr­slita­leik Meistara­deildarinnar með átta mörk og var valinn besti leik­maður helgarinnar.

„Ég held það viti allir að hann er mjög góður hand­bolta­maður, einn sá besti sem við höfum átt en hugar­farið hjá honum er alveg ein­stakt,“ segir Rúnar í sam­tali við íþrótta­deild Sýnar. „Ég held hann hafi sýnt það þessa helgi. Á þremur árum að vinna Meistara­deildina tvisvar sinnum og vera í bæði skiptin valinn besti leik­maður úr­slita­helgarinnar segir bara sitt. Hann er orðinn þekktasta nafnið í hand­bolta­heiminum í dag. Maður getur alveg sagt það og á það bara skilið líka.“

Gísli hafi staðið sig af­burðar vel líkt og Mag­deburgar liðið allt en Rúnar hefur fengið það krefjandi verk­efni að mæta þeim í þó nokkur skipti undan­farin ár.

„Þetta er mjög skemmti­legt lið, þeir ná ein­hvern veginn að halda mjög háu spennu­stigi innan liðsins. Það er alveg sama hvort ein­hver meiðist og annar leik­maður komi inn sem hefur ekki spilað í marga leiki, hann virðist koma inn eins og hann hafi spilað síðustu fimm leiki eins vel og hægt er. Maður getur bara dáðst að því hvernig þeir ná að drilla sitt lið og hvernig allir eru meðvitaðir um að þeir þurfi að standa sig þegar að þeim kemur.“

En hvað er hægt að segja um hugar­far Gísla Þor­geirs? Þegar að hann lendir í mótlæti, virðist hann bara koma sterkari til baka.

„Hann er alveg ótrú­legur. Það var örugg­lega erfitt fyrir hann þegar að þessi meiðsli fóru að gera vart um sig í byrjun en hann virðist bara hafa lært af því. Hann tekur þetta á kassann og stendur sig bara feyki­lega vel. Það hræðast hann allir hvort sem hann spilar með Mag­deburg eða ekki, það óttast hann allir. Fyrir þessa helgi var aðal­lega talað um það hvort hann yrði með eða ekki, það voru allir að pæla í því. Það borgar sig svo sannar­lega að hafa hann með.“

Nánar verður rætt við Rúnar Sig­tryggs­son í Sport­pakkanum að loknum kvöld­fréttum Sýnar í kvöld þar sem að hann gerir upp tíma sinn hjá Leipzig en hann var látinn fara sem þjálfari liðsins eftir nýaf­staðið tíma­bil.